Díli, 13/08/2019, Diretor sira rekursus umanus nian hamutuk na’in 35 hosi linhas Ministeriais no instituisaun estadu hamutuk 15 partisipa iha formasaun Painél Juri, Rekrutamentu, Selesaun no Promosaun iha funsaun publika ne’ebé realiza iha Salaun Esperanca Aimutin .
Formasaun ne’ebé sei hala’o durante loron lima (5) ne’e organiza hosi Comissão da Função Publica (CFP) no hetan apoiu finanseiru liu hosi Fundo de Desenvolvimento do Capital Humano (FDCH).
Partisipante ba formasaun ne’e rasik hamutuk 35 ne’ebé mai hosi diretór sira rekursus umanus Linhas Ministeriais no instituisaun estadu sira hamutuk 15.
Iha diskursu ba abertura formasaun ne’e Sekretáriu Ezekutivu FDCH Sr. Isménio Martins da Silva hatete prosesu rekrutamentu nudár komponente importante ida tanba ne’e formasaun ba Painél Juri Rekrutamentu, Selesaun no Promosaun iha funsaun publika importante tebes hodi kontribui ba kualidade rekursus umanus nian iha mákina estadu.
“Programa formasaun ida ohin, ita hotu konsiente katak prosesu rekrutamentu faz parte komponente importante iha ita ninia funsionalismu públiku tanba ho ida ne’e mak sei determina kualidade ita ninia mákina do estadu, ha’u hanoin ita hotu konkorda, ita hein depois de formasaun bele melhora liutan ,” hatete Sr. Ismenio Martins da Silva.
Sekretáriu Ezekutivu FDCH hatete ba futuru FDCH nafatin servisu hamutuk di’ak liután liu-liu ko’alia kona-ba mákina do estadu hodi haforsa liután funsionalizmu públiku hodi kontribui ba dezenvolvimentu nasaun nian. (Media_FDCH)