DILI, 3/03/2017 (FDCH) Hahú iha loron 2 Marsu to’o 3 Abríl komisaun organizadora ne’ebé forma kompostu husi Fundo de Desenvolvimento do Capital Humano (FDCH) Ministériu Solidariedade Sosiál (MSS) no Ministériu Edukasaun konsege simu dokumentu husi aplikante sira hamutuk 125, mane na’in 80 no feto 45 ne’ebé iha interese ba vaga bolsa Estudu ba area Enjeñaria no Saúde Animal ba rai li’ur ne’ebé FDCH loke ba Kombatentes no Veteranus nian oan.

Aplikante hirak ne’ebé kompleta ona dokumentu tuir oráriu iha loron 02 de Marsu – 03 de Abril 2017, no tuir planu sei hala’o ezame Tes Potensial Akademik (TPA) ne’ebé diretamente sei organiza husi Universidades hanesan UNUD Bali no ITS Surabaya husi dia 17-19 Abril ne’e, no sei iha mos ezame entrevista ne’ebé sei fó husi ekipa juri kompostu husi reprezentantes Universidade Udayana Bali (UNUD) no Institut Teknologi Sepulu Nopember Surabaya (ITS), Secretáriado do FDCH-MPIE, MSS, ME.

Rezultadu final sei bazeia ba rekomendasaun husi Universidades sira hodi determina susesu ida ba kandidato bolseiru sira atu hetan vaga iha Unversidade hodi simu bolsa  estudu husi Governu RDTL liu husi FDCH-MPIE.

Númeru vaga ne’ebe atu atribui ba Áreas de Enginherias ma’ak na’in 52 no na’in 10 sei hala’o ninia estudu iha Saúde Animal ho grau lisensiadu. Tanba ne’e aplikante sira ne’ebé pasa sei arranka ba Indonesia iha fulan maiu tinan ne’e.

Sekrétariu ezekutivu FDCH, Isménio Martins da Silva apresia no agradese kooperasaun di’ak entre FDCH ho Ministériu Solidariedade Sosiál (MSS) no Ministériu Edukasaun (ME) hodi simu aplikante sira.

“Ofisialmente ha’u hakarak agradese ba ita boot sira tanba servisu hamutuk ona hodi finaliza proseu rekrutamentu hodi simu aplikantes sira nian dokumentus. Númeru aplikantes ne’ebe iha, ba Secretariado do FDCH-MPIE sufisiente ona tanba tuir saida mak ita projekta ona antes atu hatama total aplikantes atu partisipa iha izame TPA haktuir duni akordu Secretariado do FDCH nian ho Universidade Udayana ho ITS molok ne’e.” dehan Sekretáriu Ezekutivu Isménio Martins da Silva.

Sekrétariu ezekutivu ne’e hateten sei fó oportunidade ba aplikante hotu hotu atu tuir ezame depois univerisidade sira mak sei haree ba valor sira ne’ebé sei pasa iha tetse.

Konkursu bolsa estudu ne’e loke ba dahuluk ho kritéria ne’ebé todan tanba aplikante hotu- hotu tenke ho valor 7 nune’e difisil tebes atu hetan aplikante.

“Rekezitus ne’ebé mak iha haree ba todan uitoan entaun ita muda tiha hafoin S,E Ministru Kay Rala Xanana Gusmão konkorda hasai fali Depacho Ministerial hodi altera ba valores media 7 ba kandidatus bolseiros sira,”dehan Sekrétariu ezekutivu Isménio Martins.

Entretantu aplikante Flavio da Conceição hateten nu’udar veteranu nia oan sente orgullu bele hetan oportunidade ne’e tanba ne’e sei esforsu-an atu estuda maka’as nune’e bele pasa iha teste.

“Ha’u garantia passa maibé ne’e sei hanesan mistériu, ha’u fiar katak ha’u passa,”dehan Flavio

Flavio hateten kuandu passa iha teste nia prontu atu estuda maka’as nune’e bele fila mai kontribui ba dezenvolvimentu nasaun ne’e nian. 

Flavio remata ninia estudu Sekundária iha Semináriu Nosa Senhora de Fatima Balide iha tinan 2016 no konkore ba vaga bolsa estudu ba iha área enjeñaria konstrusaun Naval iha ITS Surabaya, Indonésia.(Media FDCH)

Related Post :


Total Viewer : 7218 Views || Category: Notisia