DILI, 24/07/2017 (FDCH). Secretario Executivo Fundo de Desenvolvimento do Capital Humano FDCH Sr. Isménio Martins da Silva, akompaña hosi Coordenadora Gabinete Administracao Financas e Recurco Humano (GAFRHI) Sra. Leila Carceres partisipa iha serimónia Introdusaun formador lian Indonézia na’in 25 sigla iha lian Indonézia (Bahasa Indonésia Bagi Penutur Asing- BIPA).
Lian Indonézia dala barak sai hanesan obstaklu ba timoroan ne’ebé atu ba hala’o estudu iha rai Indonézia, Nune’e Governu Indonézia liu husi nia Embaixada iha Timor-Leste kontinua fó oportunidade liu hosi formasaun ba timoroan ne’ebé hakarak aprende lian Indonézia.
Formadór lian Indonézia na’in 25 ne’ebé mai atu fó apoiu ba formasaun ne’e sei konsentra atu fó formasaun iha Pusat Budaya Indonesia (PBI), Institute of Business IOB no mós ba East Timor Coffee Institute Ermera.
“Mai Timor Leste,iha tinan hirak liu ba ita haruka de’it formadór na’in ualu mak mai hodi hanorin lian Indonézia, maibé tama ba tinan 2017, iha mudansa ne’ebé boot, mais ou menus formadór hamutuk na’in 25 mak haruka mai atu ajuda hanorin lian Indonézia iha Timor-Leste,” hateten Dr. Ir. Sedercor Melatunan, Msc. Adidu Edukasaun no Cultura Indonézia nian mai Timor-Leste
Adidu Edukasaun ne’e hateten vontade timoroan ne’ebé hakarak aprende lian Indonézia aas tebe-tebes tanba totál formandós ne’ebé tuir formasaun lian Indonézia ba tinan 2017 nia kompara ho tinan liu ba ne’ebé la to’o ema na’in 100 maibé ba tinan 2017 númeru partisipante aumenta sa’e maka’as ba ema na’in 1200.
Nia espera katak iha futuru matéria lian Indonézia hahú tama mós iha ensinu Secundario la’ós de’it iha nivel universitáriu hodi prepara estudante sira ne’ebé remata ninia estudu no hakarak atu kontinua ninia estudu universitáriu iha Indonézia.
Iha fatin hanesan Embaixadór Indonézia mai Timor-Leste Sr. Sahat Sitorus enkoraza nafatin formadór sira ne’ebé atu hanorin lian Indonézia ba timoroan sira atu nafatin iha espíritu no vontade di’ak hodi hanorin.
Nia hatutan tan katak Formador hanesan mos herói altruísta (Pahlawan tanpa pamrih) ne’ebé nia favor nunka mais atu selu ho saida deit.Embaixador ne’e husu mos ba Formando sira atu aproveita oportunidade ne’ebé mak iha.
“Dala ida tan parabens ba ita bot sira, no estuda ho diak ba esforsu-an ho maka’as ,Indonesia sei nafatin pronto hamutuk ho kolega sira, ho povu tomak Timor-Leste atu nune’e avansa hamutuk. Katak Embaixador.
Nune’e mós Reitor IOB, Augustu da Conceição Soares SE, MM iha nia diskursus hato’o mos nia agreadese ba iha Governu Indonézia atravez embaixadór Indonézia nian no mós adidu edukasaun Indonesia nia mai Timor-Leste,tanba kolabora ona ho IOB hodi oferese sira nia ema mai ajuda hanorin lian Indonesia iha sira nia Universidade.
Reitor ne’e husu mós ba ninia estudante sira atu aproveita ba oportunidade ne’ebé fó tanba Timor-Leste presiza rekursus umanus ne’ebé di’ak.
“Imi tenke aprende, aprende no aprende, tempu imi nian, ami nia tempu lakleur hotu ona, ne’e duni tenke aprende atu nune’e lori ita nia nasaun ne ba oin, se la’ós imi se fali, se la’ós agora, bainhira fali,” Hatete Reitor Agusto.
Entretantu Secretario Executivo FDCH Sr. Isménio Martins da Silva iha nia diskursu hato’o mós informasaun balun kona ba servisu FDCH nian liga ba iha rekursus umanus nian, no hato’o mós informasaun relasiona ho programa bolsa estudu ne’ebé mak FDCH Selu hamutuk 3450.
Liga ba iha formasaun lian Indonézia nian, Secretáriu Executivo FDCH konkorda ho Adidu Edukasaun ne’e dehan katak vontade timoroan ne’ebé hakarak aprende lian Indonesia sa’e maka’as.
“Los duni vontade husi ita nia alin sira, ita nia kolega sira ne’ebé mak iha Timor-Leste boot tebe-tebes, tanba husi Basic Sains iha eskola balun sei nafatin adopta matéria balun ne’ebé husi Bahasa Indonesia, no tanba mós iha ita nia konstituisaun autoriza mós atu uza lingua haat iha lian ofisiál iha lian nasionál, no lian ba servisu nian,” Hateten Sr. Isménio Martins da Silva iha nia Diskursu
Tanba ne’e ami husi Governu autoriza no husu mós ba iha kolega sira ne’ebé mak hakarak atu kontinua sira nia estudu iha Indonézia ka iha nasaun seluk ne’ebé ko’alia lian Indonézia lian Melayu bele ho oportunidade ne’ebé mak iha ho PBI no embaixador Indonesia.
Antes atu taka nia deskursu secretariu Executivu ne’e mos hatutan tan katak ba oin karik ho governasaun ne’ebé foun, Rekursus Umanus sei nafatin sai hanesan Prioridade.
Serimonia Introdusaun Formador lian Indonesia ida ne’e partisipa husi Embaixador Indonesia mai Timor-Leste, adidu edukasaun Indonesia nian mai Timor-Leste, Chefe East Timor Coffee Institute Ermera, Reitor IOB, Representante Ministeriu Edukasaun, Secretariu Executivu FDCH ne’ebé akompanha husi Coordenadora GAFRHI, Formador sira no mos ho formandos sira.Seremonia ne’e rasik hala’o iha Pusat Budaya Indonesia (PBI) Merkado Lama Dili, Timor-Leste.(Media FDCH)