Dili, 16 Abril 2024. Diretór Ezekutivu ba Fundo de Desenvolvimento do Capital Humano (FDCH), Júlio Aparício  sai oradór iha Programa Mini Audénsia ba komemorasaun loron istóriku Masakre 17 Abril 1999 ba dala Ruanulu resin-lima ho tema Haklean Memoria ba Foinsa’e Hodi Ultra Passa Mentalidade Violentu ba Hametin Paz ne’ebé organiza husi Vitima ho Familia Vitima, Sekretariadu Asosiasaun Vitima, Asosiasaun HAK, AJAR, Acbit, Movimentu Estudante Direitus Umanus, CNC no Autoridade Lokal, iha Kampaun Asosiasaun HAK, Karketu.

Diretór Ezekutivu sai Oradór ho topíku“Politika Bolsa Estudu ba Vitima nia Oan Sira” iha aprezentasaun ne’e Diretór Ezekutivu aprezenta ba partisipante sobrevivente sira kona-ba FDCH ne’ebé harii iha 2011 husi ita nia Primeiru Ministro atual  Kay Rala Xanana Gusmão ne’ebé mai ho Vizaun katak sai nu’udar entidade dezenvolvimentu kapitál ka rekursus umanus ne’ebé forte hodi kontribui no reforsa dezenvolvimentu Timor-Leste.

Liu husi aprezentasaun ne’e Diretór Ezekutivu  aprezenta programa haat FDCH nian mak; Formasaun Profisioál, Formasaun Téknika, Bolsa Estudu no Jestaun Institusionál. Hahun ba programa haat ne’e maka DE husu ba  Sobreviventes sira akompaña no tau matan ba oan sira hodi estuda makaas no prepara an didiak hodi labele sai vitima ba beibeik. DE iha polítika bolsa estudu ba ema hotu inklui sobreviventes nia oan sira. Maibe sobreviventes no oan sira mós tenke iha polítika hodi aproveita bolsa estudu ne’e.

DE enkoraza joven  foinsa’e no labarik kikoan sira katak: “Ita hotu mesak oan kiak deit tan ne’e, husu ba oan kiak sira atu esforsu an didiak  liu husi estuda makaas atu labele fo oportunidade ba ema seluk ukun ita nia an, hanesan prinsipiu ba luta ukun an nian: “Mate ka Moris Ukun Rasik An.” ST-FDCH sei la  hare ba kores ema ida nian maibe haree ba ema hotu-hotu ne’ebe iha kapasidade intelektual no badinas estuda hodi konribui fila fali ba prosesu dezenvolvimentu nasaun ida ne’e iha futuru.” Tenik Diretor Ezekutivu. (Média-FDCH)

Related Post :


Total Viewer : 135 Views || Category: Notisia