Dili, 12/06/2020, Fundo de Desenvolvimento Capaital Humano (FDCH) konvoka enkontru ida ho Comissão da Função Pública (CFP) no Instituto Nacional da Adminstrção Publica (INAP) hodi halo diskusaun kona-ba mekanizmu implementasaun Dekretu Lei n.o 13/2020, 15 de Abríl, Regulamentu FDCH nian ne’ebé hetan ona promulgasaun hosi Prezidente da Repúblika no publika ona iha Jornál da Republica.
Enkontru ne’e rasik realiza iha sala reuniaun CFP, iha Matadoru ne’ebé prezide hosi Prezidente CFP Sr. Faustino Cardoso no hetan partisipasaun hosi Diretora Ezekutiva FDCH Sra. Leila M.L. Carceres dos Santos, Koordenadór Gabinete Plano Peskiza Fiskalizasaun no Verifikasaun (GAPPEFIV-FDCH) Sr. Hemenegildo da Silva, Asesora téknika FDCH Sra. Ana Paula dos Santos, Jurista FDCH Sra. Estefania Correia no Sr. Atanásio Soares, Komisária sira CFP, Sekretáriu Ezekutivo CFP nian, Diretór Jerál INAP Sr. Agostinho Letencio no ekipa téknika sira husi CFP nian.
“Objetivu husi enkontru ida ne’e mak primeiru hakarak atu rona husi Comissão da Função Pública no INAP atu haree kona-bá mekanizmu atu implenta dekretu lei n.o 13/2020, 15 de Abríl, Ha’u hanoin enkontru ida ne’e nudár enkontru kontinuasaun tanba iha 2019 iha fulan jullu iha tiha ona enkontru ne’ebé Sekretáriu Ezekutivu sesante Sr. Isménio Martins da Silva hala’o ho Prezidente CFP ho diretór Jerál INAP ne’ebé halo ona diskusaun,” hatete Diretora Ezekutiva FDCH Sra. Leila Carceres iha introdusaun ba enkontru ne’e.
Jurista ST-FDCH Sra. Estefania Correia hatete dekretu lei ne’e aléinde regula estrutura no funsionamentu FDCH nian halo mós distribuisaun kompeténsia ida ne’ebé klaru entre ST-FDCH ho CFP no INAP iha matéria formasaun no bolsa estudu ba funsionáriu públiku sira no mós públiku sira ne’ebé la integra iha kuadru administrasaun públiku nian.
“Regulamentu ida ne’e aléinde estabelese ka regula estrutura no funsionamentu Conselho de Administração do Fundo nomós Secretariado Técnico do Fundo nia regula mós regra ba finansiamentu ba projetos no progama ne’ebé mak finansia direitamente husi FDCH, iha rega refere estabelese distinsaun kompeténsia entre Comissão da Função Pública, INAP nomós Secretariado Técnico,” esplika jurista Sra. Estefania Correia.
Prezidente CFP Sr. Faustino Cardoso hatete durante ne’e formasaun sira foku liu ba kapasitasaun téknika, oinsá atu haburas kapasidade sira ne’ebé mak iha tantu iha area jeneríku , transversais entre instituisaun sira nune’e mós area espesifika instituisaun idak idak nian ne’ebé FDCH sempre apoiu maibé ba oin presiza integra tan komponente xave ida iha ámbitu formasaun karákter sidadaun atu oinsá nia hatudu kualidade sidadania ne’ebé as no responsavel, iha sensu no sentidu estadu ida ne’ebé forte, mais ou menus ida ne’e mak ita buka atu integra liután iha matéria formasaun sira nian tuir mai.
Entretantu Diretór Jerál INAP Sr. Agostinho Letencio agradese tanba diskusaun sira kona-bá dekretu lei ne’e involve kedas INAP husi inísiu to’o mai ohin loron.
“Iha parte ida ita hotu tenke orgullu tanba ita konsege no bele koordena hamutuk dezde inísiu, ita hakarak ida ne’e mak tenke kontinua nafatin, tanba emprinsipiu ita nia mandatu kuaze ba hotu objetivu ida, objetivu kapasitasaun rekursus umanus tanba ne’e intermu koordenasaun ita hakarak asegura nafatin ba oin,” hatete Diretór Jerál INAP Sr. Agostinho Letencio
Diretor ne’e konsidera importante tebes atu hahú ho prosesu sira hanesan ne’e nune’e bele koordena di’ak liután servisu entre parte hotu iha kapasitasaun rekursus umanus nian.
Durante diskusaun iha konkordánsia atu kria ekipa téknika konjunta ida entre ST-FDCH, CFP no INAP hodi halo diskusaun kle’an kona-bá mekanizmu implementasaun dekretu númeru 13/2020, 15 de Abríl, Regulamentu FDCH. (Média-FDCH)