Dili, 07 Setembru 2023. Diretór Ezekutivu Fundo de Desenvolvimento Capital Humano (FDCH), Dr. Cristóvão dos Reis ne’ebé akompaiña husi Profesionál Espesializadu ba Rekursu Umanu FDCH nian, Sr. Virgilio Ramos da Costa hala’o sorumutu ho Regional Educational Advising Coordinator-REAC husi Embaixada Estados Unidos Amerika (EUA) iha Jakarta, Indonesia, Señor Luke Yim, Director of Public Diplomacy iha Embaixada Estados Unidos Amerika nian iha Dili, Timor-Leste, Señora Diana Braunschweig, Exchange Program Coordinator, Señor Leopoldo Gusmão no Education USA Program Manager, Señora Lídia de Araújo iha Gabinete Diretór Ezekutivu FDCH.
Objetivu prinsipal husi sorumutu ne’e mak atu hala’o diskusaun kona-ba posibilidade servisu hamutuk entre parte rua, hahú husi agora ba futuru hodi atribui bolsa estudu ba estudante potensiál sira husi Timor-Leste hodi ba hala’o sira nia estudu iha Estadus Unidos Amerika iha área prioridade sira, atu nune’e sira bele kontribui ba dezenvolvimentu iha ita nia rain tuir sira ida-idak nia area estudu.
Antes ne’e FDCH mós iha ona kooperasaun ho EUA iha implementasaun programa Fulbright Scholarship iha ne’ebé FDCH apoiu parsial ba programa ne’e hodi finansia timoroan sira ba hala’o sira ninia estudu iha Estadus Unidos Amerika.
(Média-FDCH)