Orsamentu Jerál Estadu 2022 ba Fundo de Desenvolvimento do Capital Humano (FDCH) ho montante millaun $ 12 ne’ebé sei finansia programa sira FDCH nian hetan aprovasaun iha diskusaun espesialidade iha Parlamentu Nasional ho Votus a favor 44, Abstensaun 15 no kontra 1, iha sala Plenaria Uma Fukun Parlamentu Nasionál loron 14/ 12/ 2021.
OJE FDCH ba tinan 2022 sei kontinua finansia programa haat (4) ne’ebé FDCH iha hanesan 1).Formasaun Profisionál ho orsamentu $ 1,027,800.00 ne’ebé sei finansia formasaun ba foin’sa’e sira iha lian Korea ho Ingles hodi prepara sira ba servisu iha rai li’ur, orsamentu ne’e FDCH finansia liu husi Sekretariu Estadu Formasaun Profisionál no Empregu (SEFOPE), 2). Formasaun Téknika ho Orsamentu $3,567,543.00 ne’ebé sei finansia programa no atividade ba Instituisaun akreditadu hamutuk 12. 3). Bolsa Estudu ho orsamentu $ 6,533,064.00 ne’ebé sei finansia programa bolsa estudu ezistente iha rai-laran, rai-li’ur no bolsa Parsial, bolsa Hakbi’it, Bolsa ba públiku tuir meritu no bolsa ba estudu ba dosente sira husi ensinu superior privadu, no 4.) Tipu Formasaun seluk ho orsamentu $ 871,593.00 ne’ebé sei finansia atividade Apoiu subsidiu pedidu individuais, Programa estajiu profisionál, Estudu no peskiza no Kustu operasionál.
Ho orsamentu ne’ebé hetan ona aprovasaun husi Parlamentu Nasionál iha tinan 2022 sei finansia atividade 62 no sei benefisia timoroan hamutuk na’in 56298, husi númeru ne’e feto 28014 no mane 28284.
Tuir dadus ne’ebé rejista hahú husi ejistensia FDCH nian tinan 10 hahú husi 2011-2021 rejista benefisiariu ba programa haat (4) FDCH nian hamutuk benefisiariu 88337 ne’ebé fahe ba kada programa hanesan formasaun Profisional ho benefisiariu 34855, formasaun teknika ho benefisiariu 34438, Bolsa Estudu 6401 no Tipu formasaun seluk ho benefisiariu 12643.
Entreatnu orsamentu FDCH nian ba tinan fiskal 2022 ho montante millaun $12 kompara ho tinan anterior 2021 hetan redusaun orsamentu $ 995,000.00 kompara ho tinan 2021 nian maske nune’e ladun afeita ba programa sira ne’ebé ejiste ona.
Aliende ne’e ezekusaun orsamentu FDCH tinan fiskal 2021 ho montante millaun $12.9 to’o iha fulan Dezembru ne’e FDCH ninia persentajen ezekusaun atinje porsentu 79.4 %. (**)