Díli, 05/07/2019, Sekretária ezekutiva Fundo de Desenvolvimento do Capital Humano (FDCH) Interina Sra. Leila Carceres dos Santos akompaña hosi koordenadór GAPPEFIV Sr. Filomeno Lay no Xefe Departamentu DEPPEFIV Sra. Maria Rosa Pinto halo enkontru ida ho Komandante Jerál Polísia Nasionál Timor-Leste (PNTL) Komisáriu Sr. Faustino da Costa iha Kuartél Jerál, Caicoli.
Iha enkontru ne’e FDCH fahe informasaun kona-ba prosedimentu no lala’ok sira oinsá atu responde ba programa adisionál sira no koordena mós ezekusaun planu programa PNTL nian iha parte dezenvolvimentu Rekursus Umanus iha área formasaun no bolsa-estudu tinan 2019 no planu programa ba dezenvolvimentu rekursus umanus PNTL nian iha tinan 2020.
Enkontru ne’e nudár mós enkontru dahuluk ne’ebé FDCH halo ho Komandante PNTL Komisáriu Sr. Faustino da Costa ho ninia estrutura foun.
Komandante PNTL apresia ho disponivilidade FDCH nian hodi fahe informasaun kona-ba prosedimentu sira ne’ebé ohin loron iha no sei koopera di’ak liután ho FDCH hodi haree ba programa formasaun profisionál no bolsa estudu ba membru PNTL nian.
Entretantu PNTL nudár instituisaun estadu ne’ebé akreditadu iha FDCH nune’e iha tinan 2019 ho orsamentu hamutuk $300.000.00 ne’ebé sei finansia ba programa hamutuk 15.(Media FDCH)