Manufahi,06 Abril 2022. Diretór Ezekutivu Fundo de Desenvolvimento do Capital (FDCH) Dr. Cristovão dos Reis ofisialmente asina kontratu no entrega bolseiru Bolsa Hakbiit na’in 33 ba Institutu Politékniku Betano (IPB) no na’in 20 ba Institutu Boaventura Timor Leste (IBTL).
Bolseiru Bolsa Hakbi’it ne’ebé hala’o estudu iha IPB, iha area Konstrusaun Sivil no Produsaun Animal ho nivel estudu Diploma (DII) no bolseiru ne’ebé hala’o estudu iha IBTL iha area Enjeñaria Sivil no Enjeñaria Informatika ho nivel estudu Lisensiatura (S1).
Iha IPB Bolseiru hirak ne’e simu direita husi Prezidente IPB Dr. Acacio Cardoso Amaral ne’ebé akompaña husi ninia estrutura no dosente sira, no iha IBTL bolseiru sira simu husi Reitor Interinu Sr. Gregorios Seran ho ninia estrutura no dosente sira.
Hafoin asina tiha kontratu no entrega bolseiru foun sira ba institutu rua ne’e, Diretór Ezekutivu FDCH ne’ebé akompaña mós husi Koordenadoor Gabinete Servisu Pagamentu (GASEPA-FDCH) Sr. Aderito Soraes ho ekipa halo mós monitoriazaun no avaliasaun ba bolseiru bolsa hakbi’it na’in 20 iha IPB no na’in 10 iha IBTL ne’ebé hahú ona sira ninia estudu iha institutu publiku IPB ho institutu privadu IBTL iha 2021 ne’ebé nudár benefisiariu dahuluk ba programa Bolsa Hakbi’it nian. Hodi haree direita bolseiru sira nia kondisaun no halo mós avaliasaun ba bolseiru sira nia aproveitamentu durante hala’o sira nia estudu.
Ohin loron bolseiru programa Bolsa Hakbi’it ne’ebé hala’o sira nia estudu iha IPB hamutuk 53 no bolseiru ne’ebé hala’o nia estudu iha IBTL hamutuk na’in 30.
Programa Bolsa Hakbi’it nudár programa VIII Governu nian ne’ebé implementa husi Ministériu Ensinu Superior Siensia no Kultura (MESCC) liu husi Sekretáriadu Tékniku FDCH, programa ne’e implenta dahuluk iha 2021 ho benefisiariu 910 no iha 2022 ho benefisariu 1000, bolsa ne’e oferese hodi enkoraza foinsa’e sira ne’ebé mai husi familia kbi’it laek atu asesu ba hala’o estudu iha banku universidade no instituisaun ensinu superior sira iha rai-laran.(Média_FDCH).