Díli,31/05/2021. Instituisaun estadu tolu hanesan Comissão da Função Publica (CFP) , Fundo de Desenvolvmento do Capital Humano (FDCH) no Instituto Nacional da Administração Publica (INAP) estabelese ona nota entendimentu ida hodi servisu hamutuk iha ambitu prosesu selesaun bolsa estudu, rejime asisténsia ba estudu no formasaun ba funsionáriu públiku sira.
Objetivu husi estabelesimentu nota entendimentu ne’e hodi regula no kria odamatan ida de’it sobre tratamentu ba programa bolsa estudu, rejime asistensia estudu no formasaun ba funsionáriu públiku sira tanba durante ne’e Ministériu ida-idak aprezenta ninia proposta ba FDCH.
Serimónia asinatura ba nota endentimentu ne’e hala’o iha salaun CFP, Matadoru, , ne’ebé asina direita husi Diretora Ezekutiva FDCH Sra. Leila Carceres dos Santos, Diretór Jerál INAP Sr. Agostinho Letencio no Sekretaria Ezekutiva Sekretariadu CFP Sra. Santarina Rosario Xavier, serimonia ba estabelesimentu nota entendimentu ne’e prezide husi Prezidente CFP Sr. Faustino Cardoso no patisipa mos husi komisáriu sira CFP nian.
Ho nota entendimentu ne’ebé estabelese, instituisaun tolu ne’e sei promove servisu hamutuk iha ámbitu prosesu selesaun bolsa estudu, rejime asistensia ba estudu no asaun formasaun sira no dezenvolvimentu ba funsionáriu públiku no ajente administrativu sira.
Etabelesimentu servisu hamutuk ne’e bazeia mós ba dekretu lei númeru 13/2020 15 de Abril ne’ebé fó mós kompeténsia ba CFP, INAP atu organiza programa formasaun, programa bolsa estudu, apoiu asisténsia estudu fó kompeténsia tomak ba iha CFP ne’ebé na’in ba funsionáriu públiku sira nomos fó ba iha INAP atu bele implementa programa sira ne’e
Knaar prinsipál sira ne’ebé maka FDCH, CFP no INAP sei halo mak hanesan Planeamentu, implementasaun no mós monitorizasaun. (Média-FDCH)