ERMERA 9/06/2017 (FDCH) Guarda Diresaun Nasionál Seguransa Patrimóniu Públiku (DNSPP) hamutuk na’in 53 kompostu hosi permanente na’in 15 no kontratadu 38 simu sertifikadu hafoin kompleta tiha formasaun durante loron 10 ne’ebé apoiu husi Fundo de Desenvolvimento do Capital Humano (FDCH).
Guarda DNSPP ne’ebé simu sertifikadu ne’e mai hosi Munisipiu haat hanesan Aileu na’in 10 inklui feto na’in 3, Bobonaro na’in 15, Likisa na’in 10 no Ermera na’in 15 maibé na’in 3 voluntáriu ne’ebé hakarak atu aprende buat ruma husi formasaun ne’e.
Diretór Jerál operasionais Ministériu Interior Sr. Domingos Pinto hateten ho apoiu hosi Fundu de Desenvolvimento do Capital Humano (FDCH) tinan-tinan sei fó formasaun ba seguransa sira hodi bele eleva sira nia kapasidade.
“Formasaun ne’e buat di’ak ida, katak buat ida aprende ne’e la iha limite, ita sei moris ita tenke aprende hodi hadi’a ita nia koñesimentu, hadi’a ita nia hahalok tanba ne’e ita halo buat sira ne’e liu hosi formasaun no treinamentu,” hateten Diretór Jerál operasionais Ministériu Interior Sr. Domingos Pinto iha nia diskursu iha serimónia enserramentu ba formasaun no fahe sertifikadu ba formandu sira iha Gleno.
Formasaun ne’ebé la’o durante loron 10 ne’e fahe ba parte rua parte primeiru haree liu ba teoria hanesan lejizlasaun lei funsaun Públiku, lei orgánika Ministériu Interior, Konstituisaun RDTL, Sistema Operasionál no étika moral, Misaun no vizaun DNSPP. Parte daruak nian iha parte tékniku mak Ordem unida, Atendementu Públiku, auto defeza no utilizasaun meus seguransa ba servisu loro-loron.
Diretór ne’e informa ohin loron guarda DNSPP besik ema rihun rua no husi númeru ne’e pemantente 930 no kontratadu 1015 tanba ne’e atu fó formasaun ba seguransa sira presiza tempu no tenke la’o ho fazeadamente.
“Ita hein katak tinan oin mai ita sei iha nafatin osan para fó fali formasaun ba sira seluk ne’ebé seidauk tuir, neneik-neneik sira ne’ebé tuir ona formasaun báziku bele hakat fali ba nivel médiu,” dehan tan diretór ne’e.
Entretantu xefe departamentu GAPPEFIV Sr. Filomeno dos Santos Lay ne’ebé reprezenta Sekretáriu ezekutivu Fundu de de Desenvolvimento do Capital Humano (FDCH) hateten FDCH kontinua prontu atu apoiu tanba FDCH harii atu eleva kapasidade rekursu umanu iha TL.
“FDCH estabelese atu eleva kapasidade rekursu umanu tanba rekursu umanu nu’udar elementu importante ba dezenvolvimentu nasaun nian,” Hateten Sr. Filomeno Lay
Entretantu Ministériu Interior hanesan membru akreditadu ba FDCH ho nia orsamentu ba formasaun por volta 100.mil ital hodi halo kapasitasaun ba nia funsionariu tomak durante iha tinan 2017 nia laran.
Prezensa FDCH nian iha eseramentu ba formasaun ne’e atu halo monitorizasaun no halo mós avaliasaun ba formasaun nune’e hetan fali rekomendasaun no sujestaun nune’e iha futuru saida mak presiza haree no hadi’a hamutuk.
Tanba ne’e hafoin remata serimónia ne’e ekipa FDCH konsege fahe formuláriu ba benefisiariu sira hodi prense no halo mos entrevista ho formador sira kona-ba dezafiu sira ne’ebé sira hasoru durante formasaun ne’e.
Serimónia enserramentu ba formasaun no entrega sertifikadu ba formandu sira ne’e partisipa mós husi Prezidente Autoridade Munispiu Ermera, Komandate Polísia Munisípiu Ermera, F-FDTL no konvidadus sira iha Munisípiu Ermera rasik.(Media FDCH)