DILI, 29/08/2018 Ministério do Ensino Superior, Ciência e Cultura atraves Secretariado Técnico Fundo de Desenvolvimento do Capital Humano (ST-FDCH- MSCC) realiza 2o Enkontru Grupu Traballu ba Dezenvolvimentu Rekursu Umanu ho Parseiru Dezenvolvimentu Internasional ne’ebé ho objetivu atu re-estabelese “Working group” ho parseiru dezenvolvimentu ka doadores sira hodi dezenvolve rekursu umanu iha nasaun foun Timor-Leste hodi apoiu ba dezenvolvimentu iha setór hotu-hotu.
Secretário Executivo do FDCH Sr. Isménio Martins da Silva hatete enkontru ne’e hetan orientasaun hosi Ministro Ensino Superior, Ciénsia e Cultura Dr. Longinhos dos Santos atu haree ba programa durante loron 100 Ministériu nian, primeiru atu haree ba programa no preparasaun planu Linhas Ministeriais no Intituisaun Autónomu Estadu sira ne’ebé hetan finanseiru hosi FDCH no halo mós koordenasaun ho parseiru dezenvolvimentu sira hodi haree mós preparasaun planu Rekursus Umanus ba iha tinan tuir mai.
“Enkuantu ita diskute hela ita nia Orsamentu Jerál do Estadu ba 2018 maibé iha mós preparasaun ba 2019 tanba ne’e Señór Ministro Ensino Superior Ciénsia e Cultura Dr. Longuinhos dos Santos orienta katak ita tenke halo koordenasaun ho parseiru dezenvolvimentu sira, Organizasaun ne’ebé apoiu ba area dezenvolvimentu rekursus umanus ninian tantu ba formasaun nomós bolsa de estudus, nomós nu’udar parte ida atu hetan pontu devista doadores sira nian no sira nia input balun,” hatete Secretario Executivo do FDCH Sr. Isménio Martins
Iha programa MESCC loron 100 nian sei haree mós ba programa sira anterior, haree mós ba koordenasaun entre Linhas Ministeriais ho doadores sira.
Iha enkontru ne’e Secretario Executivo do FDCH Sr. Isménio Martins da Silva aprezenta mós dokumentu sira ne’ebé FDCH prodús ona hanesan Mapeamentu no Analiza Dadus Rekursus Umanus ba Setór Públiku iha Timor-Leste, Giaun ba Bolsa Estudu no Formsaun, no Rezultadu Levantamentu Dadus Rekursus Umanus Ezisténte, iha oportunidade ne’e mós Koordenadór Gabineti Gestão Sistema Informação (GAGESI-FDCH) halo mós aprezentasaun kona-ba dadus númeru benefisiariu sira ne’ebé ohin loron FDCH iha ba parseiru dezenvolvimentu sira.
Enkontru ne’ebé hala’o iha Salaun Knowledge Center FDCH ne’e partisipa hosi instituisaun hamutuk 25 ne’ebé mai hosi reprezentante sira hosi Embaixada Amérika, Embaixada Nova Zelandia, Embaixada Japaun, Embaixada Korea, Embaixada Brazil, Embaixada Portugal, Embaixada Filipina, Embaixada Indonesia no ajénsia internasionál sira hanesan ADB, World Bank Group, GIZ, DFAT, WDPTL, CARDNO, ILO no JICA.
Entretantu hosi Instituisaun Governu nian hosi Ministériu Finansas, SEFOPE, Komisaun Nasionál Timor-Leste ba UNESCO, PNDS, INAP-MAE no Comissão da Função Publica.
Iha enkontru ne’e doadór sira sente orgullu tanba liuhosi diskusaun ne’e bele ajuda sira atu iha kolaborasaun ne’ebé di’ak liután hodi kontribui ba dezenvolvimentu rekursus umanus nasaun foun ne’e nian. Enkuantu parte sira konkorda atu sorumutu tuir mai sei organiza fali hosi parseiru dezenvolvimentu seluk ligadu ho dezenvolvimentu rekursu umanus iha Timor-Leste (Media FDCH)