Dili,01 Fevereiru 2024, Konsellu Administrasaun ba Fundo de Desenvolvimento do Capital Humano (CA-FDCH sigla Portugés) realiza enkontru konsellu administrasaun ba dala-28 hodi halo diskusaun no aprovasaun ba planu asaun anual FDCH nian ba tinan 2024 no programa sira Diretór Ezekutivu nian durante mandatu, iha iha sala enkontru Ministériu Finansa Pista 2 Ai-Tarak laran.
Enkontru (CA- FDCH) ne’e prezide direita husi Sua Exélensia Ministru Planeamentu Investimentu Estratéjiku (MPIE) núdar Prezidente Konsellu Administrasaun FDCH, Eng. Gastão Francisco de Sousa , iha ne’ebé partisipa mós husi membru permanente CA-FDCH nian hanesan , Sua Exelénsia Ministru Ensinu Superior, Siénsia no Kultura Sr. José Honório da Costa Pereira Jerónimo, Sua Exelensia Ministra Finansa Sra. Santina Viegas no Sua Exelensia Sekretariu Estadu Formasaun Profisionál no Empregu Sr. Rógerio Araújo Mendonça.
Enkontru ne’e hahú ho aprezentasaun husi Diretór Ezekutivu FDCH, Júlio Aparício, ho Profisionál espesializadu Planu Peskiza no Monitorizasaun (DNPMF-FDCH), Hermenegildo da Silva kona-ba planu asaun anual ne’ebé sei implementa iha tinan 2024 haktuir ba prioridade governu nian iha dezenvolvimentu rekursu umanus Timor-Leste no rezultadu monitórizasaun ba bolseiru sira iha rai-laran no rai-li’ur.
Hafoin aprezentasaun, Konsellu Administrasaun halo diskusaun hodi halo aprovasaun ba programa sira ne’ebé sei implementa no halo mós apresiasaun ba relatóriu monitórizasaun ba bolseiru sira ne’ebé hala’o hela sira ninia estudu iha rai-li’ur.
Konsellu Administrasaun mak orgaun ida ne’ebé aas liu no halo desizaun iha Sekretáriadu Tekniku FDCH. Papél konsellu nian mak atu fó konsellu ba polítika, aprovasaun no dirasaun kona-ba dezenvolvimentu rekursu umanu iha Timor-Leste nomós programa FDCH no projetu sira iha Timor-Leste.
Partisipa iha enkontru Konsellu Administrasaun dahuluk iha tinan 2024 ne’e Asesór sira husi MPIE, MESCC, SEFOPE, FDCH no tékniku sira iha Sekretáriadu Tékniku-FDCH.
(Média-FDCH)