Betano, 19/07/2021. Diretora Ezekutiva Fundo de Desenvolvimento do Capital (FDCH) Sra. Leila M.L. Carceres dos Santos ho Prezidente Institutu Politékniku Betano (IPB) Dr. Acacio Cardoso Amaral asina kontratu ho bolseiru na’in 20 ne’ebé hola parte iha programa Bolsa Hakbi’it ne’ebé admitidu hodi kontinua sira nia estudu iha Instituto Politékniku Betano (IPB) ho nivel estudu diploma II (D2) iha area konstrusaun sivíl no produsaun Animál.

Iha diskursu Diretora Ezekutiva FDCH hato’o agradesimentu ba IPB tanba liu husi kooperasaun servisu ne’ebé di’ak tebes hodi simu estudante bolseiru programa Bolsa Hakbi’it hodi hala’o sira ninia estudu iha IPB.

Diretora FDCH subliña Bolsa Hakbi’it ne’e foka liu ba ema kbi’it laek nia-oan sira ne’ebé foin ba dala uluk realiza husi VIII Governu liu-husi FDCH ne’ebé liu husi asesu ingresu hodi tama iha UNTL ho IPB.

“Orsamentu ida ne’e apoiu ba ema ne’ebé laiha kbi’it signifika katak ita-bo’ot sira hola parte iha ne’e merese duni atu hetan oportunidade ida nee hanesan ema kbi’it laek nia oan maibé karik ita-boot sira la’os ema kbiit laek nia oan maka ami iha ekipa monitorizasaun husi FDCH sei tun direita ba ita boot sira nia fatin hodi haree situasaun real ne’ebé ita boot hasoru, karik ita-boot sira la’os ema kbi’it laek nia oan maka FDCH sei hapara kontratu.” hatete diretora ezekutiva FDCH.

Iha fatin hanesan Prezidente IPB Dr. Acacio Cardoso Amaral hateten nia parte haksolok no agradese ba FDCH hodi fó bolsa estudu ba estudante sira IPB nian liu husi kanál espesiál ne’e no husu ba estudante sira atu hala’o estudu ho di’ak nune’e bele termina sira ninia estudu ne’ebé ho apoiu orsamentu husi governu liu husi FDCH.

“Ha’u haksolok no agradese tebes ba ekipa husi FDCH ne’ebé mai husi nasionál ba imi nia apoiu hodi hala’o rekrutamentu estudante IPB 2021 ba kanal espesiâl ida ne’e, no iha oportunidade ida ne’e ita mós agradese ba Diretora ezekutiva nia laran di’ak hodi hala’o diskusaun ho Ministériu hodi loke vaga ba kanál ida ne’e nomós ba imi estudante sira tenke aproveita didi’ak tanba estadu apoiu ba imi ho montante orsamento ne’ebé boot hodi aloka ba imi bolseiru kbiit laek sira, maka iha oportunidade ida ne’e ita bo’ot sira utiliza didi’ak no estuda maka’as hodi responde ba ita bo’ot sira nia futuru,” hatete Prezidente IPB

Iha oportunidade hanesan reprezentante bolseiru sira hato’o ninia agradesimentu ba FDCH ho IPB ne’ebé fó ona bolsa ba sira hodi kontinua sira ninia estudu.

“Ami hanesan Estudante kbi’it laek Ami agradese ba FDCH ho IPB tanba bele fó oportunidade di’ak ida ne’e, maske ami kbiit laiha maibé ho a oportunidade ne’e ami haksolok tebes” hatete Cornelios Meol

Partisipa iha serimónia asina kontratu ho bolseiru sira ne’e Koordenadór GAPPEFIV-FDCH Sr. Hermenegildo da Silva, Koordenadór GAGESI-FDCH Sr. Henrique do Rosario, ekipa téknika FDCH no husi parte IPB Vise Prezidente IPB ho estrutura, dosente no estudante sira IPB nian.

Programa Bolsa Hakbi’it ne’e rasik nu’udar programa dahuluk ne’ebé governu investe hodi fó oportunidade ba família kbi’it la’ek nia oan sira asesu ba hala’o sira ninia estudu iha ensinu superior iha rai laran, iha tinan ne’e programa Bolsa Hakbi’it ho ninia benefisiariu hamutuk 910 ne’ebé koloka ba Universidade públiku UNTL ho IPB hamutuk bolseiru na’in 500 no ba Universidade privadu sira hamutuk bolseiru na’in 410 ho area estudu iha oin-oin ne’ebé bolseiru sira define ona. (Média_FDCH)

Related Post :


Total Viewer : 1201 Views || Category: Notisia