Oe-Cusse, 22/03/2018 Secretario Executivo do Fundo de Desenvolimento do Capital Humano (FDCH), Sr. Isménio Martins da Silva  partisipa iha serimónia abertura formasaun Nivel Munisipiu no asina akordu téknika Instituto Nacional da Administração Publica (INAP) ho Dili Institutu Teknolojia (DIT)  ne’ebé hala’o iha Rejiaun Administrativu Espesiál Oe-Cusse Ambeno (RAEOA).

Abertura ba formasaun nivel munisipiu ne’e hala’o direita hosi Vise Ministru Administrasaun Estatal S.E. Sr. Jose Anuno ne’ebé partisipa mós hosi Diretór INAP Sr. Agostino Letencio, Reprezentante prezidente RAEOA Sra. Leonia da Costa Monteiro no  prezidente Autoridade sira hosi  Munisipiu no ninia reprezentante sira.

Vise Ministru Administrasaun Estatal, Jose Anuno husu ba funsionáriu sira atu aprende no buka hatene nafatin siénsia hosi formasaun sira nune’e bele dezenvolve di’ak liután sira nia kapasidade.

“Ba Funsionáriu tomak iha RAEOA, importante tebe-tebes, iha tempu nafatin no tenke aprende nafatin, ita labele gaba-an kata ha’u funsionáriu ona ha’u labele aprende ona, ha’u nu’udar vise ministru mós presiza ita aprende nafatin ne’e duni oportunidade ne’e imi uza didi’ak ba,” Tatoli vise ministru ne’e iha ninia diskursu.

Atividade formasaun ne’ebé  hala’o iha RAEOA mak hanesan formasaun jestaun no lideransa, Formasaun ba Eskritoriu no Formasaun ba Standar  operational Procedure (SOP) no formador ba formasaun hirak ne’e mai hosi dosente no formador sira hosi INAP.

Reprezenta Prezidente Autoridade  Oe-Cusse Leonia da Costa  Monteiro hateten  preparasaun ba kondisaun ohin loron iha Oe-Cusse importante tebes tanba  dezenvolvimentu la’o daudaun, importante tebes atu prepara rekursus umanus nune’e bele hala’o servisu iha futuru.

“Ita tenke sente, hanesan Timor-Leste tenke sente katak Zona Espesiál Ekonomia Sosiál de Merkadu presiza fó atensaun liu hosi rekursus umanus, rekursu umanu ita presiza prepara, prepara kondisoens ba ita nia profisionais sira ba ita nia estudante sira ba ita nia setór privadu sira, ba ita nia komunidade sira hotu tanba sei iha fasilidade barak tebe-tebes sei akontese iha Oe-Cusse,” dehan Sra. Leonia Monteiro.

Liu hosi servisu hamutuk ho Fundo de Desenvolvimento do Capital Humano ho RAEOA ,  INAP  no ho DIT nu’udar kooperasaun ne’ebé junta atu prepara rekursu umanu, rekursus umanus prinsipál  ba Oe-Cusse oan sira, profesionais Oe-Cusse oan sira, estudante Oe-Cusse oan sira tanba kondisoens fasilidade hahú iha ona.

“Fasilidade ne’ebé ita iha ita atu hadi’a aban bainrua rekursu umanu mak ita forsa, ho ida ne’e ami agradese tebe-tebes,” dehantan reprezentante prezidente autoridade ne’e.

Ba futuru Oe-Cusse presiza tebes rekursus umanus iha area oin-oin ne’ebé kualifikadu tanba ne’e RAEOA sei koopera hamutuk ho FDCH hodi prepara planu ba dezenvolvimentu rekursus umanus atu asesu ba merkadu traballu.

Entretantu Secretario Executivo Fundo de Desenvolvimento do Capital Humano FDCH, Sr. Isménio Martins da Silva apresia no fó parabéns ba INAP ne’ebé marka-tan istória foun ida iha funsaun públiku nian liu-liu iha RAEOA.

“Hakarak hato’o parabéns ba Ministériu Administrasaun estatal no RAEOA ZEESM   hamutuk ho INAP ne’ebé ohin marka-tan istória ida ba iha ita nia istória funsaun públiku nian liu-liu iha RAEOA ZEESM ho ámbitu ba ita reforsa ita nia instituisaun  no mós tuir kedas planu ne’ebé hosi IV governu konstitusional,” Hateten Sr. Isménio Martins da Silva

Sekretáriu ezekutivu FDCH ne’e hateten uainhira Fundu de Desenvolvimento do Capital Humano harii iha 2011 mai to’o VII governu konstitusional iha fulan Outubru S.E. Sr. Prezidente da Repúblika  Francisco Guterres Lu’Olo nomós Primeiru Ministru Dr. Mari Alkatiri husu ba FDCH atu kontinua iha planu ba dezenvolvimentu rekursus umanus hodi  haforsa,  la’ós de’it ba setór públikus maibé mós ba sidadaun timoroan tomak.

Tanba ne’e FDCH tenke nafatin hametin nia planu, servisu ho linas ministeriais tomak nomós povu tomak,  autoridades munisipius tomak inklui mós ho ZEESM atu nune’e bele harii planu ida ne’ebé di’ak hodi dezenvolve rekursus umanus iha timór-Leste bazeia ba Planu Estratéjiku Dezenvolvimentu Nasionál (PEDN) ne’ebé Timor-Leste hatuur ona.

Sekretáriu ezekutivu FDCH ne’e esplika mós prezensa no servisu FDCH nian nu’udar parte ida atu asegura Planu Estratéjiku Nasionál (PEDN)  ba timór laran tomak iha  ámbitu formasaun profisionál  prepara futuru traballadores kualifikadus  ba merkadu traballu, ida fali reforsa funsionáriu públiku sira iha formasaun no bolsa estudu.

Molok partisipa iha serimónia abertura ba formasaun ne’e Sekretáriu ezekutivu FDCH akompaña mós delegasaun ida ne’ebé kompostu hosi Prezidente Autoridade Munisipiu ho ninia reprezentante sira halo vizita hodi haree direita dezenvolvimentu ne’ebé la’o iha Oe-Cusse hanesan konsege haree no observa sistema irrigasaun Tono, Pista Aeroportu Oe-Cusse no Konstrusaun ba edifísiu Administrasaun RAEOA.(Media FDCH)

 

Related Post :


Total Viewer : 926 Views || Category: Notisia