Dili, 13 Fevereiru 2024. Fundo de Desenvolvimento do Capital Humano (FDCH), Instituto Nacional da Administração Publica (INAP) ho Comissão da Função Publica (CFP) organiza enkontru ho Liña Ministérial sira (LMs) hodi aprezenta orsamentu ba programa formasaun estratéjiku, Jenériku, bolsa estudu no asisténsia estudu ba funsionáriu públiku sira iha tinan 2024, iha Salaun INAP,Comoro Dili.
Objetivu husi enkontru ne’e mak atu halo koordenasaun no rona diretamente planu sira husi LMs, no orsamentu ba programa sira hanesan Formasaun Profisionál, Formasaun Téknika, Bolsu Estudo no Tipu Formasaun Seluk nomós benefisiárius ba programa hirak ne’e hodi aposta ho Formuláriu Planu Atividade no Orsamentu (F-PAO) ne’ebé INAP submete ona mai iha Sekretariadu Tékniku Fundo de Desenvolvimentu do Capital Humano (ST-FDCH) hodi determina pakote orsamentu tuir projesaun orsamentu ba tinan 2024.
Iha oportunidade ne’e, Diretór Ezekutivu FDCH, Júlio Aparício husu ba LMs atu prepara planu ho di’ak hodi nune’e tempu besik ita hein implementa de’it programa sira ne’ebé mak iha ona, FDCH prontu atu apoiu LMs hodi hare hamutuk planu sira ne’ebé mak kada Ministériu sira prepara hodi implementa ho di’ak nune’e bele kontribui ho di’ak liutan ba dezenvolvimentu rekursus umanus iha administrasaun públiku.
Diretór Ezekutivu akresenta , tinan ne’e FDCH fó prioridade ba LMs hanesan Ministériu Saúde, HNGV, INS-SP hodi hasai kursu iha área espesialidade ho objetivu atu hamenus tranférensia pasiente ba rai-li’ur maibé la taka dalan ba instituisaun sira seluk hodi promove sira ninia rekursus umanus iha area estratéjiku sira.
Akompaña Diretór Ezekutivu partisipa iha enkontru ne’e Diretór Nasionál Planu, Peskiza, Monitorizasaun no Fiskalizasaun (DNPPEFM-FDCH), Moises Soares no Tékniku sira. (Média-FDCH)
Related Post :
Total Viewer : 142 Views ||
Category: Notisia