Tilomar, 29 /11/ 2020, Diretora Ezekutiva Fundo de Desenvolvimento do Capital Humano Sra. Leila Caceres dos Santos ho ekipa halo monitorizasaun no akompaña alunu sira 5º Curso Promoção a Oficial Superior (CPOS) iha Instituto de Defesa Nacional hodi halo vizita estudu ba postu Polísia Nasionál Timor-Leste (PNTL) Unidade Polísia Fronteira (UPF) iha Postu Foho Lulik, Postu UPF Aikakar, postu UPF Fatumea no postu UPF Bee Lulik kraik iha Munisipiu Covalima.
Objetivu husi monitorizasaun ne’e hodi akompaña no haree direita lala’ok programa formasaun no vizita estudu iha terrenu tanba formasaun ne’e organiza husi IDN no finansia husi Fundo de Desenvolvimento do Capital Humano.
Aluno iha 5º Curso Promoção a Oficial Superior ne’e hamutuk na’in 28 ne’ebé kompostu husi Kapitaun FALINTIL Forsa Defesa Timor-Leste (F-FDTL) na’in 20 no Inspetór Xefe PNTL na’in 8 ne’ebé hahú ona kursu iha fulan Fevereiru 2020 no tuir planu sei remata iha fulan Fevereiru 2021.
Vizita estudu ba area fronteira sira nu’udar mós matéria ida iha formasaun tanba ho vizita estudu ne’e aluno sira bele haree direita saida mak akontese iha Postu UPF sira no bele fó oportunidade ba alunu sira atu halibur dadus no informasaun hodi prepara ba hakerek sira ninia teze hodi aprezenta bainhira atu termina sira ninia kursu ne’ebé ho durasaun tinan ida ne’e. (Média_FDCH)