Dili,21/02/2020, Diretora Ezekutiva Fundo de Desenvolvimento do Capital Humano (FDCH) Sra. Leila Carceres dos Santos sai sasin ba estabelesimentu akordu protokolu kooperasaun entre Instituto Defesa Nacional (IDN) ho Universidade da Paz (UNPAZ) ne’ebé realiza iha auditoria CNE, Dili.
Protokolu kooperasaun ne’e asina direita husi diretór IDN Profesór Doutór, Donaciano Costa Gomes ho Magnífiku Reitor Universidade da Paz Dr. Adolmando Soares Amaral.
Ho protokolu kooperasaun ne’ebé estabelese ona entre IDN ho UNPAZ sei fó oportunidade ba parte rua atu servisu hamutuk ho di’ak liután no sei fornese formasaun ba estudante universitáriu sira iha area defeza no seguransa nasionál nian.
Diretór IDN Profesór Doutór, Donaciano Costa Gomes hatete IDN ninia papél espesializadu maka iha area defeza no seguransa Nasionál nune’e ho estabelesimentu protokolu kooperasaun ne’e sei fornese formasaun espesialidade ba estudante universitáriu sira iha area defeza no seguransa nasionál nian.
Nune’e mós Magnifiku Reitor UNPAZ Dr. Adolmando Soares Amaral hatete ho kooperasaun ne’e UNPAZ iha responsavilidade moral hodi ko’alia kona-ba defeza no seguransa. No liu husi kooperasaun ne’e UNPAZ sei sinerjia ba iha kurikulu ho rekursu ne’ebé iha hodi bele ajuda UNPAZ rasik no IDN.
Iha intervensaun Diretora Ezekutiva FDCH Sra. Leila Carceres hatete papél FDCH nian mak atu asegura jestaun finanseira iha investimentu públiku liu-liu iha area dezenvolvimentu rekursus umanus nasionál liga ho Planu Estratéjiku Dezenvolvimentu Nasionál (PEDN) 2011-2030 faze segundu, hodi hametin instituisaun iha rai laran liu husi edukasaun ida ne’ebé ho kualidade iha instituisaun ensinu superior sira.
Ho nune’e fiar katak kooperasaun ne’ebé estabelese sei haforsa UNPAZ atu bele ajuda no fó forsa ba juventude sira ne’ebé sai hanesan jerasaun foun, ho kualidade ne’ebé di’ak, matenek no nakonu ho espíritu patriotízmu no nasionalizmu.
Akompaña DE partisipa iha serimónia entabelesimentu protokolu kooperasaun ne’e, Asesora Teknika FDCH Sra. Ana Paula dos Santos, Tékniku Administrativu DEPPEFIV Sr. Prodencio R. Dias no Sra. Francisca Imaculdada Gomes. (Média_FDCH)