Dili, 18/1/2019. Sekretáriu Ezekutivu Fundo de Desenvovimento do Capital Humano (FDCH) Sr. Isménio Martins da Silva afirma prontu kontribui ba programa Millenium Challenge Coorporation (MCC) nian iha Timor-Leste.
Liafuan ne’e Sekretáriu Ezekutivu hato’o bainhira tuir enkontru hamutuk ho Compact Development Team MCC Timor-Leste nian ne’ebé hala’o iha salaun enkontru Ministério da Reforma Legislativa e Assuntos Parlementares, Palácio do Governo, Dili.
“Nu’udar instituisaun ida ne’ebé iha ona esperiénsia natón kona-ba programa dezenvolvimentu rekursus umanus nian, ha’u sente ami (FDCH) prontu atu kontribui ba programa MCC nian ne’e,” dehan Sekretáriu Ezekutivu durante ninia introdusaun.
Razaun kontribuisaun ne’e, tanba haree ba importánsia husi programa MCC nian ne’ebé ligadu ho Dezenvolvimentu rekursu umanus hanesan programa Skill Development. Tanba ne’e Sekretáriu Ezekutivu ne’e fó ninia hanoin katak importante mak koordenasaun servisu ho di’ak atu bele garante kualidade programa tomak.
“Ha’u haree programa MCC nian ne’e di’ak tebe-tebes, maibé bainhira atu implementa ita presiza kolabora hamutuk atu bele garante kualidade programa,” tenik Isménio.
Depoisde rona tiha pozisaun Fundo de Desenvolvimento do Capital Humano ne’ebé prontu atu kolabora no kontribui, Diretór Ezekutivu MCC Timor-Leste Sr. Constâncio Pinto hato’o agradese barak ba hanoin ho kontribuisaun sira.
“Ami agradese tebes ho hanoin sira husi FDCH, husu para ba oin ita bele la’o hamutuk hodi haforsa programa MCC nian ne’e”. dehan Diretór Ezekutivu MCC Sr. Constâncio Pinto.
Tuir planu MCC sei halo lansamentu públiku iha fulan Fevereiru tinan 2019. Entretantu marka prezensa iha enkontru refere Sr. Constâncio Pinto (Diretór Ezekutivu MCC), Sr. Isménio Martins da Silva (Sekretáriu Ezekutivu FDCH), Sr. Henrique do Rosário (Koordenador GAGESI-FDCH) inklui Diretores husi Ministériu relevante sira. (Média FDCH)