Dili,17/11/2017 Ministru Saúde Dr. Rui Maria de Araújo, hamutuk ho Embaixador Cuba ba Timor-Leste Sr. Oscar Genaro Coet Blackstock, Secretário Executivo Fundo de Desenvolvimento do Capital Humano no diretór sira Ministeriu Saúde nian hala’o serimonia despedida ho bolseiru hamutuk na’in 29, hosi numeru ne’e na’in 2 sei hala’o sira nia estudu mestradu iha area medisina no na’in 27 seluk sei hala’o estudu iha area médiku espesialista nian iha nasaun Repúblika Cuba.
Ministru Saúde Dr. Rui Maria de Araújo iha ninia diskursu hateten kursu espesialista sira ne’ebé ohin loron bolseiru sira foti iha realasaun ho moras ne’ebé barak iha Timor-Leste.
“Espesialista sira hanesan kardiologia, onkologia no neufrologia ne’e espeliazasaun ne’ebé iha relasaun ho moras sira ne’ebé barak liu ita transfere ba rai liur. Nune’e atu responde ba dezafiu hirak ne’e ba mediu ou longu prazu ita planeia apartir ohin, hodi nune’e aban bainrua ita bele kria kondisaun di’ak liutan atu fo asistensia espesializada ba ita nia pasientes,” hateten Dr. Rui
Ministru ne’e husu ba bolseiru sira katak misaun importante mak ba estuda sai espesialista ne’ebé di’ak fila mai atu servi povu Timor-Leste.
Bolseiru na’in 29 ne’e iha feto na’in 5 de’it tanba ne’e Ministru Saúde husu atu iha etapa tuir mai sei haree mós ba asuntu ida ne’e, hodi enkoraja mediku jeral feto foti mós espesializasaun iha area oin-oin.
Ministru Saúde husu mós ba bolseiru sira atu ba hala’o sira nia estudu ho di’ak bainhira remata sira nia estudu fila mai halo servisu ho profisionalizmu la’ós servisu tan osan.
“Osan la’ós buat hotu, satisfasaun boot liu nu’udar medico profisionál maka, depois de tratamentu, pasiente ko’alia ‘Obrigado’. Folin la iha, ida ne’e mak ita presiza hanesan profesionais,”Tenik Ministru ne’e.
Entretantu Secretario Executivo Fundo de Desenvolvimento do Capital Humano (FDCH) Sr. Isménio Martins hateten FDCH prontu servisu hamutuk ho Ministériu Saúde atu asegura sira nia kursu ba tinan tolu no depende mós ba bolseiru sira nia dezempeñamentu maibé espesialista ne’e bele lori tinan tolu to’o tinan haat.
Orsamentu ne’ebé sei aloka ba médiku espesialista sira ne’e kada ema ho montantete $100.000 resin to’o sira remata sira ninia estudu iha rai Cuba no sei la sura ho orsamentu ba kustu moris bolseiru sira nian. (Media FDCH)