DILI,27/04/2017, Fundo de Desenvolvimento do Capital Humano (FDCH) halo serimónia despedida ho bolseiru Veteranus no Kombatentes nian oan hamutuk na’in 52 na’in 10 sei hala’o ninia estudu iha area Medisina Veterinaria nian iha Universidade Udayana Bali (UNUD) no na’in 42 sei hala’o sira nia estudu iha área enjeñaria nian iha universidade Institut Teknologi Sepuluh Nopember  Surabaya (ITS)-Indonézia ho grau lisensiadu.

Serimónia despedida ho bolseiru sira ne’ebé  hala’o iha salaun enkontru Ministériu Defeza Fatuhada ne’e partisipa husi Vise Prezidente Konsellu Administrasaun Fundo de Desenvolvimento do Capital Humano atuál Ministru Koordenadór Asuntu Sosiál no Ministeriu Edukasaun, Sr, Antonio da Conceição ho membru permanente  sira Konsellu Administrasaun FDCH nian hanesan Ministru Justisa Sr, Ivo Valente, Ministru Petróleu no Rekursu Minerais Sr, Alfredo Pires, Secretário Executivo FDCH, Ismenio Martins da Silva  no konvidadus sira hanesan Koordenadór Gabinete  Apoiu Bolseiru Ministériu Edukasaun  Sr, Aquilis Salvador Guterres,diretór Jerál Veterináriu Ministériu Agrikultura no Peskas (MAP) Antonino do Carmo, inan aman bolseiru sira, diretór sira iha FDCH no konvidadus sira.

Iha diskursu Vise Prezidente Konsellu Administrasaun FDCH Sr, Antonio da Conceição ne’ebé reprezenta Prezidente Konsellu administrasaun FDCH S,E  Kay Rala Xanana Gusmão,  husu ba bolseiru sira atu rejiste no afirma espíritu ne’ebé inan aman sira hala’o hodi liberta nasaun foun ne’e nian.

“Imi kombatentes no veteranus da libertasaun da patria ninia oan, aman kombatentes oan tenkesér rejiste duni no afirma espíritu ne’ebé inan aman sira halo, hodi halo komprimisu ho estadu atu ba estuda, ba hanesan estudante e fila hanesan ema ne’ebé kualifikadu,” dehan Sr, Antonio da Conceição.

Atuál Ministru Edukasaun ne’e husu ba bolseiru hirak ne’e atu kontinua afirma sira nia-an hanesan ema timoroan no tenke buka integra-an iha sosiedade.

Entretantu Secretário Executivo FDCH Sr, Isménio Martins da Silva hateten bolseiru hirak ne’e selesionadu hafoin tuir tiha ezame Tes Potensial Akademi(TPA) ne’ebé organiza direita husi Universidade Udayana Bali (UNUD) ho Universidade Institut Teknologi Sepuluh Nopember Surabya (ITS)- Indonézia no mós ezame entrevista ne’ebé  fó husi ekipa juri kompostu husi reprezentantes Universidades Secretáriado do FDCH-MPIE, Ministerio Solidariedade Sosiál (MSS) no Ministerio  da Educação (MdE).

Secretaário Executivo FDCH Sr, Isménio Martins kontinua husu ba inan aman sira atu kontinua apoiu moral ba nia oan sira nune’e sira bele hala’o hotu ninia estudu hodi fila mai kontribui ba dezenvolvimentu nasaun foun ne’e nian.

“Bolseiru hirak ne’e kuandu hahú ona sira nia estudu, kada fulan neen sira tenke haruka sira nia nota mai FDCH no sei tenta para fahe mós ho inan aman sira, nune’e inan aman mós bele hatene valor oan sira nian,” Secretário Executivo FDCH ne’e hatete.

Entretantu reprezentante inan aman bolsieru sira, Nelson Ximemens apresia ho programa bolsa estudu ne’ebé governu fó ba Kombatentes no Veteranus nian oan tanba ne’e husu ba bolseiru sira atu estuda maka’as nune’e fila mai kontribui ba dezenvolvimentu nasaun foun ne’e nian ne’ebé harii ho ruin no ran.

“Imi ba tenke kapasita-an tanba uluk ami luta la iha ema ida mak kapasita ami, mate saugati de’it, soe ruin no ran iha fatin-fatin, hakilar ema ida la ajuda ami, maibé ohin loron ita nia nasaun hamriik ajuda ona ita, katak imi mós bele veteranus nia oan mós bele,” Tatoli Nelson ba bolseiru sira

Nune’e mós reprezentante bolseiru Agostino Ramos promete atu hala’o ninia estudu ho susesu nune’e bele lori buat di’ak ruma mai kontribui ba dezenvolvimentu nasuan foun ne’e nian bainhira remata sira nia estudu.

“Fiar katak ami sei lori buat ne’ebé mak di’ak no mantein nafatin prinsipiu ne’ebé kombatentes da libertasaun sira uluk lori hakarak independénsia, agora ami nu’udar  nia oan ami mantein nafatin pozisaun ida ne’e atu kontribui buat ne’ebé mak di’ak ba rai doben ida ne’e,” dehan bolseiru ne’ebé atu ba hala’o ninia estudu iha universidade ITS Surabaya iha área Enjeñaria ne’e.

Bolseiru ne’e mós apresia no orgullu ho programa bolsa estudu ne’e tanba bele fó  oportunidade ba oan kombatentes no veteranus sira atu ba hala’o estudu iha estranjeiru.

“Ami hato’o ami nia obrigado no agradese wain  ba ita nia nai ulun sira ne’ebé tau nafatin dignidade ba  kombatentes da livertasaun hodi fó oportunidade ba ami oan sira hodi ba hala’o estudu iha ema nia rai,” hatete Agostino

Bolseiru sira ne’ebé hala’o ninia estudu iha area enjeñaria nian iha ITS sei hala’o sira nia estudu iha  área Matemátika, Enjeñaria Mekániku, Enjeñaria Elétrika, enjeñaria Kímika Enjeñaria Fízika, Enjeñaria industrial, Enjeñaria ba materiais no metalurgia, Design Industrial, Planeamentu Urbanu no regional, Enjeñaria ba Konstrusaun Naval, Enjeñaria ba sistema konstrusaun Naval, Enjeñaria Naval no Transporte Marítimu.  (Média FDCH )

Related Post :


Total Viewer : 1313 Views || Category: Notisia