Dili, 12 Juñu 2023. Diretór Ezekutivo Fundo Desenvolvimento do Capital Humano (FDCH), Dr. Cristóvão dos Reis, hala’o enkontru ho reprezentante Banku Mundial Sr. Bernard Harborn iha edifisiu Banku Mundial Lecidere hodi ko’alia kona-ba posibilidade kooperasaun servisu iha futuru liga ba dezenvolvimentu Rekursu Umanu (RU) Timor-Leste nian.

Iha enkontru ne’e Diretór Ezekutivu aprezenta ba reprezentante Banku Mundial Sr. Bernard Harborn kona-ba rezultadu investimentu ba dezenvolvimentu rekursus umanu iha Timor-Leste, liu husi programa haat ne’ebé ejizte hanesan, Formasaun Téknika, formasaun Profisionál, Bolsa Estudu no tipu formasaun sira seluk ne’ebé FDCH iha durante ne’e haktuir prioridade Planu Estratéjiku Dezenvolvimentu Nasionál Timor Leste 2011-2030.

Reprezentante Grupu Banku Mundial, Sr. Bernard Harborn hatete Banku Mundial prontu atu koopera ho FDCH hodi haforsa dezenvolvimentu Rekurus Umanus Timor-Leste iha aspeitu hotu-hotu nune’e, bele responde ba merkadu traballu no kontribui ba redusaun númeru dezempregu iha Timor-Leste.

Hafoin enkotru Diretór Ezekutivu FDCH Dr. Cristóvão dos Reis entrega mós livru sira ne’ebé FDCH produs liga ho dezenvolvimentu rekursu umanu Timor-Leste nian hanesan livru  Mapeamentu  no Analize Dadus Rekursus Umanus ba Setor Publiku iha Timor-Leste no livru  Levantamentu Dadus Rekursus Humanus Timor-Leste nian ba reprezenta Banku Mundial. (Média_FDCH)

Related Post :


Total Viewer : 1242 Views || Category: Notisia