DILI, 15/11/2019, Sekretáriu Estadu Formasaun Profisionál no Empregu (SEFOPE) hamutuk ho Fundo de Desenvolvimento do Capital Humano (FDCH) halo despedida ba joven na’in (10) ne’ebé atu ba tuir formasaun iha area hospitalidade nian durante fulan neen (6) iha STP (Sekolah Tinggi Pariwisata) Bali, Indonesia.

Joven  na’in sanulu ne’e nu’udar benefisiariu dahuluk governu nian ba programa formasaun iha area hospitálidade, no selesaun ba sira hala’o  husi Hotel Novo Turismo ne’ebé hetan fiar husi SEFOPE.

Diretór Jerál SEFOPE Paulo Alves hatete programa formasaun iha area hospitalidade ne’e nu’udar polítika governu nian hodi kapasita joven  sira atu  asesu ba kampu servisu no hadi’a liutan servisu hospitalidade nian iha Timor-Leste.

Iha intervensaun Diretora Executiva do FDCH Sra. Leila ML Carceres dos Santos husu ba joven hirak ne’e atu konsentra no hatudu vontade di’ak hodi aprende buat ruma nune’e, fila mai bele kontribui ba dezenvolvimentu ekonomia nasaun nian.

“Servisu hotu-hotu ita bele halo maibé ita iha kooperasaun ho ita nia atitude, se lae ha’u hanoin ida ne’e ita la ba oin,  aprende tenke iha mós atitude ida ne’ebé di’ak para bele aprende nomós kolabora”. Tatoli Diretora Executiva ne’e ba benefisiariu sira iha Salaun SEFOPE Caicoli.

Diretora Executiva do FDCH Sra. Leila ML. Carceres konsidera programa ne’e importante tanba benefisiariu ba  formasaun ne’e fila mai bele  integra kedas ba iha merkadu traballu.

Hanesan Diretora Ezekutiva ne’ebé foin simu ninia mandatu iha inísiu fulan Novembru ne’e sujere ba SEFOPE atu kontinua nafatin  ho programa sira ne’ebé iha ona no husu atu halo mós monitorizasaun ba sentru formasaun sira ne’ebé iha no halo mós identifikasaun ba benefisiariu sira ne’ebé hetan ona formasaun ohin loron sira iha ne’ebé no halo saida.

Entretantu Diretór Operasionál Hotel  Novo Turismo, Santonino Pereira hatete joven na’in sanulu (10) ne’e bainhira remata  formasaun fila mai sei koloka sira hodi servisu iha Hotel Novo Turismo bazeia ba kompromisu ne’ebé halo ona ho Governu.

Programa formasaun ne’e realiza tanba antes ne’e SEFOPE ho FDCH asina tiha  akordu kooperasaun ho STP, Bali hodi fó kapasitasaun ba timoroan sira iha area hospitalidade ninian.   (Media FDCH).

Related Post :


Total Viewer : 390 Views || Category: Notisia