Dili,9/1/2019, Sekretáriu Ezekutivu Fundo de Desenvolvimento do Capital Humano (FDCH) Sr. Isménio Martíns da Silva husu ba estudante sira tenke aproveita tempu ne’ebé iha ho di’ak no hatoman-aan hodi aprende no estuda maka’as nune’e bele prepara futuru ne’ebé di’ak.
Liafuan ne’e hato’o husi Sekretáriu Ezekutivu Fundo de Desenvolvimento do Capital Humano (FDCH) Sr. Isménio Martíns da Silva kuarta feira semana ne’e, bainhira halo palestra kona-bá edukasaun pirante estudante foun sira Escola Técnico Vocacional (ETV) nian iha Becora, Dili.
Sekretáriu Ezekutivu ne’e preokupa ho sistema eskolár iha Timor-Leste ne’ebé seidauk orienta ninia estudante sira atu hatene saida mak sira (estudante) sei halo bainhira remata estudu.
“Eskola sira iha Timor-Leste, tenke hanoin ona hanorin estudante sira atu hatene sira nia futuru” tenik Isménio durante ninia palestra.
Tuir Sekretáriu Ezekutivu katak agora estudante barak mak remata ona sira estudu maibé sira la hatene atu halo saida. Situasaun ne’e mak fó implikasaun boot ba aumentu númeru dezempregu nian iha rai-laran.
“Tanba selae imi la hatene saida mak sei halo bainhira remata imi nia eskola” hatete Sekretáriu Ezekutivu ne’e.
Maske nune’e, lideransa FDCH ne’e mós fó nafatin korrajen ba estudante sira atu aproveita didi’ak sira nia estudu iha ETV ne’e tanba tuir nia fasilidade sira iha eskola refere apropriadu ona atu halo aprendijazen.
“Eskola ne’e (ETV) iha poténsia makaas ho ninia fasilidade sira, tanba ne’e husu ba imi (estudantes) atu aproveita ho maneira aprende no estuda makaas”.
Tuir observasaun, estudante sira rona ho antusiásmu tebes palestra sira ne’ebé hato’o husi Sekretáriu Ezekutivu FDCH ne’e, entretantu marka prezensa iha programa refere mak Diretór Escola Técnico Vocacional (ETV) inklui ekipa profesores sira. (Média FDCH)