Dili, 16 Novembru 2023. Sua Exélensia Ministru Planeamentu no Investimentu Estratéjiku (MPIE) no Prezidente Konsellu Administrasaun ba Fundo de Desenvolvimento do Capital Humano (CA-FDCH), Sr. Gastão Francisco de Sousa nomeia Dr. Júlio Aparício hodi lidera Sekretariadu Tékniku Fundo de Desenvolvimento do Capital Humano (ST-FDCH) ho mandatu tinan haat (4) hodi troka Diretór Ezekutivu sesante Dr. Cristóvão dos Reis.
Ministru MPIE, Sr. Gastão Francisco de Sousa hateten kargu ne’e la’os permanente tanba ne’e to’o tempu ida tenke entrega ba ema seluk, maibé instituisaun tenke la’o nafatin ba oin hodi lori dezenvolvimentu ba povu no nasaun.
“Ha’u fiar ba ita-boot sira hotu katak ita sei la’o ba oin ho di’ak liutan, buat ne’ebé di’ak ita mantein, buat ne’ebé ladun di’ak ita hadi’a diak liutan, para servi ita-nia nasaun ita nia povu, liu-liu ba ita nia oan sira ne’ebé eskola hela iha ensinu superior,” hateten Ministru MPIE iha aprezentasaun Diretór Ezekutivu FDCH foun ba Diretór Nasionál, Xefe Departamentu no Funsionáriu sira FDCH nian iha salaun enkontru Knowledge Center, Palacio do Governo.
Diretór Ezekutivu Sekretariadu Tékniku FDCH, Dr. Júlio Aparício agradese ba konfiansa ne’ebé depozita husi Exélensia Ministru MPIE no Prezidente Konsellu Administrasaun FDCH nian hodi nomeia nia nu’udar Diretór Ezekutivu FDCH ho mandatu tinan haat (4).
“Iha 1991 kuandu ha’u iha Atambua ha’u lee livru ida, Ego Sum Serva Servarum, ha’u lee iha tempu ne’eba ha’u kaer to’o agora, atu dehan atan ha’u ne’e atan ba atan hotu hotu, ita nia estadu Timor-Leste adopta sistema demokrasia ne’e katak sai lider ne’e sai hanesan atan ba ema hotu,” hateten Dr. Júlio Aparício.
Diretór Ezekutivu fiar katak durante nia mandatu sei servisu hamutuk ho parte hotu hodi lori FDCH ba oin no lori mudansa ba dezenvolvimentu rekursu umanu Timor-Leste nian.
“Sei servisu hamutuk ho parte hotu hodi lori FDCH ba oin no halo mudansa uitoan, tenke eskluzivu uitoan labele ema seluk la’o neneik ita mós la’o neneik, ha’u fiar katak ita hotu nia servisu hamutuk ita bele la’o ba oin.
Tuir lei organika Governu Konstitusionál da-sia (IX), Sekretariadu Tékniku-FDCH tutela iha Ministériu Planeamentu Investimentu Estratéjiku (MPIE) no Lei Organika MPIE nian Sekretariadu Tékniku-FDCH nu’udar administrasaun indireita ba MPIE.
Lee mos iha :http://www.fdch.gov.tl/ministru-mpie-nomeia-dr-julio-aparicio-lidera-fdch/
(Media-FDCH)