Palembang, 30 Agostu 2023. Diretór Ezekutivu Fundo de Desenvolvimento do Capitál Humano (FDCH), Dr. Cristóvão dos Reis ho Prezidente Administrasaun Navegasaun Aerea Timor-Leste, Empreza Publika (ANATL, EP), Sr. José Trindade, akompaña husi Asesor prinsipal Ministériu Planeamentu no Investimentu Estratéjiku (MPIE) Sr. Julio Tomas Pinto, asina akordu téknika (Memorandum of Agreement) ho Vise Diretór II Politéknik Penerbangan Palembang Sr. M.Syukri Pesilette, iha Jl. Adi Sucipto, Sukodadi, Kec. Sukarami, sidade Palembang, Sumatera Selatan .
Objetivu husi estabelesimentu akordu téknika ne’e atu servisu hamutuk no loke dalan ba timoroan sira ne’ebé hetan bolsa estudu ne’ebé FDCH finansia liu husi ANATL, EP hodi ba hala’o sira ninia estudu iha area aviasaun nian iha Politeknik Penerbangan Palembang.
Tuir planu iha tinan ne’e timoroan na’in haat mak sei hahú hala’o uluk sira nia estudu iha Politeknik Penerbangan Palembang iha area espesifiku hanesan Bombeiros Aeroportu (fire fighting) no parte sira konkorda mós atu aumenta númeru bolseiru timoroan sira ba kontinua estudu iha Palembang iha tinan oin.
Alénde asina akordu kooperasaun, ekipa delegasaun partisipa mós iha serimónia Judisium ba finalista sira hamutuk 68 ne’ebé termina ona sira ninia estudu iha Politékniku ne’e.
Programa bolsa estudu ne’ebé ANATL organiza no finansia liuhusi FDCH nu’udar investimentu ida ne’ebé sei prepara foinsa’e timoroan sira atu servisu iha aeroportu sira ne’ebé Timor-Leste iha.