Oe-Cusse, 25/04/2018. Fundo de Desenvolvimento do Capital Humano (FDCH) liuhosi Gabinete Planu, Peskiza, Fiskalizasaun no Verifikasaun (GAPPEFIV) hala’o monitorizasaun ba programa formasaun ne’ebé organiza hosi Instituto Nacional de Administração Pública (INAP) iha Rejiaun Administrativa Espesial Oecusse-Ambeno (RAEOA).
Objetivu hosi monitorizasaun ne’e maka atu asegura finansiamentu hosi investimentu publiku ba formasaun no dezenvolvimentu rekursus umanus nasional no promove Transparansia no responsabilidade liuhosi hadi’a relatóriu no prestasaun kontras kona-ba ezekusaun programa no projetu ba formasaun no dezenvolvimentu kapital umanu.
Formasaun ne’ebé partisipa hosi ema na’in 25 ne’e, foka liu ba Jestaun Lideransa Tekniku ho meius oinsá nu’udar lideransa, sira bele iha jestaun ida di’ak atu rezolve problema sira ne’ebé mosu iha komunidade nia leet.
Koordenador ba ekipa monitorizasaun FDCH Sr. Prudêncio Dias iha ninia intervensaun hatete katak FDCH nia prezensa iha formasaun ne’e atu garante prosesu la’o ho di’ak, nune’e ba oin FDCH sei bele kontinua finansia nafatin formasaun sira hanesan ne’e.
“Ami mai atu garante de’it prosesu sira la’o ho di’ak, nune’e ba oin fundus (FDCH-red) bele fasilita nafatin programa sira hanesan, nune’e bele hasa’e liutan ita nia kapasidade iha area ida-idak nian.” dehan Sr. Prudêncio durante aprezentasaun ekipa.
Entretantu Diretor Formasaun INAP Sr. José de Araújo Chang orgullu tebes ho ekipa FDCH ninia prezensa iha formasaun refere tanba tuir Diretor nee alende finansia, FDCH mós hakarak hatene direita prosesu sira.
“Formasaun ida-ne’e hetan finansiamentu hosi FDCH, tan ne’e ami orgullu tebe-tebes ekipa FDCH bele to’o no haree direita prosesu formasaun ne’e.” tenik José Chang durante ninia intervensaun.
Tuir orariu ne’ebé iha, formasaun ne’e sei hala’o durante loron 5 nia-laran, hahú hosi 23 Abríl no sei remata iha 28 Abríl tinan 2018. Enkuantu partisipantes ba formasaun ne’e maka Administrador Postu sira hosi Munisípiu Dili, Liquiça, Ermera, Bobonaro no RAEOA rasik. ( Media FDCH)