Dili 17/9/2019. Fundo de Desenvolvimento do Capital Humano (FDCH) estabelese enkontru durante loron haat hodi halo verifikasaun no konfirmasaun tékniku husi propostas orsamentu tinan 2020 Liña Ministeriais inklui instituisaun akreditadus sira nian iha Salaun Lasama Ministério das Finanças, Aitarak-laran, Díli.
Enkontru intensivu ne’e estabelese bazeia ba enkamiñasaun despaxu hosi Vise Minístra das Finanças no Ministra Finanasa Interina Sra. Sara Lobo Brites liuhusi Diresaun Jerál Finansas Estadu númeru 458/Gab.DGFE/MdF/IX/2019 atu estabelese Komite Revizaun Orsamentu Tékniku (KROT) nune’e bele fasilita prosesu filterizasaun ba proposta sira ne’ebé mai husi Liña Ministeriais no instituisaun autónomu sira hamutuk neen-nulu-resin-rua (62).
Tuir observasaun durante enkontru Liña Ministeriais (LMs) no Instituisaun Autónomus (IA) barak mak simu pakote orsamentu husi FDCH ho razaun Orsamentu Jerál Estadu (OJE) tinan 2020 ne’ebé atribui mai FDCH menus liu kompara ho tinan kotuk, maibé husi parte seluk LMs no IA barak mós mak hato’o proposta adisionál relasiona ho sira nia montante pakote orsamentu husi FDCH.
Hataan ba ida-ne’e, Sekretáriu Ezekutivu FDCH aumesmu tempu nuudar mós Prezidente KROT Sr. Isménio Martins da Silva rekomenda ba proponents atu halo justifikasaun ne’ebé profunda konabá programa no atividades sira ne’ebé sita ona orsamentu boot, nune’e ekipa KROT bele aprezenta iha Komisaun Revizaun Orsamentu Polítika (KROP) semana oin mai.
Proponentes maioria reprezenta husi Diretor-Jerais, Diretores Rekursus Umanus no Xefi Departementus.
Enkuantu husi KROT kompostu husi Prezidente, Sr. Isménio Martins da Silva (Reprezenta Fundo de Desenvolvimento do Capital Humano – FDCH), Visi Prezidente I, Sr. Agostinho Letêncio de Deus (Reprezenta Instituto Nacional de Administração Pública – INAP), Visi Prezidente II, Sr. Francisco da Costa Pereira (Reprezenta Comissão da Função Pública – CFP) no membru sira mak hanesan tuir mai; Sr. Epifánio de Carvalho Martins (Reprezenta Ministério das Finanças – MdF), Sra. Maria Esperança (Reprezenta Secretaria Estado Igualdade e Inclusão – SEII) no Sr.Ivan Alves (Reprezenta Unidade de Planeamento, Monitorização e Avaliação – UPMA). (Média FDCH)