Dili, 06 Fevereiru 2024. Diretór Ezekutivu ba Fundo de Desenvolvimento do Capital Humano (FDCH), Júlio Aparício akompaña husi Diretóra Nasionál Servisu Pagamentu, Alexandria da C. Viegas, Vise-Reitor Área Sientífika no Pedagójika Ensinu Graduasaun UNDIL, Francisco Martins da Silva ho Vise-Reitor Assuntu Akadémiku, Sosiál no Alumni UNDIL, Hugo Lorenço realiza enkontru ho bolseiru sira bolsa Hakbiit ho bolsa parsiál ne’ebé daudaun ne’e hala’o hela sira nia estudu iha Universidade Dili (UNDIL), iha sala enkontru UNDIL, Mascarinhas.
Objetivu enkontru ne’e hodi buka hatene no haree direita Bolseiru sira bolsa Hakbiit no bolsa Parsiál FDCH nian ne’ebé hala’o sira ninia estudu iha UNDIL iha area oi-oin hahú husi nivel estudu Diploma III to’o Lisensiatura (S1).
Iha oportunidade ne’e Diretór Ezekutivu FDCH dezafia estudante bolseiru sira atu konsentra de’it iha sira ninia estudu hodi hetan valór ne’ebé di’ak, tanba iha kritéria bolsa nian bolseiru sira ne’ebé hala’o estudu iha área Siénsia naturais ninia valór tenke 2.75 ba leten no Siénsia Sosiál, nia valór tenke 3.00 ba leten.
Diretor Ezekutivu akresenta tan katak sai benefisiariu FDCH tenke esforsu hodi hetan valor ne’ebé diak liu husi valor estandar iha leten. Tanba FDCH apoiu bolseiru sira haree liu ba prinsipiu FDCH:“KUALIDADE” hodi kontribui ba dezenvolvimentu nasaun ne’ebé forte no kualidade.
Vise Reitór UNDIL, Francisco Martins da Silva, agradese ho prezensa Diretór Ezekutivu ho ekipa ne’ebé hala’o vizita ba UNDIL hodi realiza enkontru ho bolseiru sira no UNDIL nafatin nakloke no prontu servisu hamutuk ho FDCH hodi tau matan ba bolseiru sira.
Benefisiariu ba programa Bolsa Hakbiit no bolsa Parsiál ne’ebé daudaun ne’e hala’o sira nia estudu iha UNDIL hahú husi 2021 to’o 2023 hamutuk 358, iha área sira hanesan, Seíensia Saúde, Enjeñaria, Ekonomia, Direitu, Relasaun Internasionál no Ekonomia.
Ekipa FDCH sei kontinua halo vizita ba universidade no instituisaun ensinu superiór sira ne’ebé daudaun ne’e bolseiru sira hala’o sira ninia estudu ba iha fulan Fevereiru to’o Marsu tinan ne’e.
(Média-FDCH)