DÍLI,26/07/2021, Konsellu Administrasaun Fundo de Desenvolvimento do Capital Humano (CA-FDCH- sigla Portugues) realiza enkontru ba dala 21 iha sala reuniaun Novo Turismo.
Enkontru CA-FDCH ne’e prezide husi Ministru Ensinu Superiór, Siénsia no Kultura (MESCC) ne’ebé nu’udar Prezidente CA-FDCH S.E. Sr. Longuinhos dos Santos no marka mós prezensa husi membru permanente CA-FDCH nian hanesan Ministru Justisa S.E. Sr. Manuel Cárceres da Costa, Ministru Petróleu no Minerais S.E. Sr. Víctor da Conceição Soares, no Sekretáriu Estadu Formasaun Profisionál no Empregu S.E. Sr. Alarico de Rosario.
Enkontru CA-FDCH ne’e hahú ho aprezentasaun husi Diretora Ezekutiva FDCH Sra. Leila M.L. Carceres dos Santos kona-bá taxa ezekusaun Orsamentu Jerál Estadu (OJE) 2021-Livru -6 hahú husi Janeiru-Jullu tuir programa kada instituisaun sira ne’ebé akredita mai FDCH.
Durante enkontru prezidente ho membru CA-FDCH sira halo analiza no aprovasaun ba tetu Orsamentu Jerál Estadu (OJE) 2022- Livru 6 FDCH nian ho montante $10 miloens tuir pakote fiscal ne’ebé atribui husi Ministériu Finansas, maibe tanba orsamentu ba FDCH ki’ik liu kompara ho tinan sira anterior ho nune’e prezidente ho membru sira halo aprovasaun hodi husu orsamentu adisional ho montante $9.4 milloens hodi kompleta OJE FDCH ba 2022 ho total $19.4 miloens.
Prezidente CA-FDCH ho membru sira aprova mós tabela kona-bá harmonizasaun kustu moris (Custo da vida) ba programa bolsa estudu no aprovasaun ba atualizasaun tabela orsamentu kona-bá pedidu apoiu individuiais ba estudante sira iha rai-laran no rai-li’ur.
Autoriza mós implementasaun Estudu no Avaliasaun ba rezultadu programa FDCH nian durante periodu 2015-2020 ne’ebé ST-FDCH sei realiza ho kooperasaun Instituto Nacional Ciência e Tecnologia (INCT) ne’ebé antes ne’e asina ona memorandu entendimentu ho FDCH.
Nune’e mós Prezidente CA-FDCH ho membru sira autoriza Sekretariadu Tékniku FDCH hodi halo analiza klean kona-bá rejime ba formadór nasionál no internasional ba programa formasaun profisionál no téknika hodi bele iha harmonizasaun ba kustu formadór sira
Enkontru CA-FDCH ba dala 21 no ba dala rua iha VIII Governu nia mandatu ne’e termina ho nomeasaun Diretór Ezekutivu FDCH Sr. Hermenegildo da Silva hodi subtitui Diretora Ezekutiva Sra. Leila M.L. Carceres dos Santos ne’ebé rezigna-an tanba asuntu familia. (Média_FDCH)