Díli, 16 Fevereiru 2024. Diretór Ezekutivu ba Fundo de Desenvolvimento do Capital Humano (FDCH), Júlio Aparício ne’ebé akompaña husi Diretór Nasionál Koordenasaun Ezekusaun ba Programa no Projetu no Jestaun ba Sistema Informação (DNKEPPJSI-FDCH), Francisco da Silva Sarmento , Asesóra Téknika Márcia Sarmento Gonçalves Aparício no ekipa téknika hala’o sorumutu ho Manager International Partnership (Sponsor Relations), Flinders University, Adelaide, South Australia, Odile Ruijs, ne’ebé akompaña husi Eis-Alunu husi Flinders University, Dr. Felix Piedade.
Objetivu husi vizita kortézia mai FDCH hodi explora oportunidade no posibilidade kooperasaun hodi bele apoiu nesesidade rekursu umanu iha Timor-Leste liu-husi FDCH hanesan oferese bolsu estudu ba timoroan sira hodi ba kontinua sira nia estudu iha Flinder University iha área “Gestão de Recursos Hídricos ou Water Resource Management.
Manager International Partnership (Sponsor Relations), Flinders University, Adelaide, South Australia, Odile Ruijs hatete objetivu husi nia vizita mai iha Timor-Leste mak hanesan atu hametin relasaun entre parte Flinders University ho Eis-Alunus no promove kolaborasaun entre Eis-Alunus iha setór no instituisaun sira, atu fornese informasaun ba ema ne’ebé aplika bolsa estudu ba Australia “Australian Awards Scholarship”, fornese informasaun ba bolseiru timoroan sira ne’ebé sei to’o iha Adelaide iha fulan hirak tuir mai no atu aumenta koñesementu kona-ba Flinders University ba públiku en jerál.
Nia haktuir iha fulan hirak liu ba, Vice-President no Vice-Chancellor (International) husi Flinders University, Sebastian Raneskold hala’o sorumutu kortezia ho Embaixadora Timor-Leste ba Australia Inês Maria de Almeida, wainhira referida Embaixadora nia prezensa iha Flinders University relasiona ho kontextu survei ou inkeritu kona-ba bem-estar husi traballador timoroan migrante sazonais ne’ebé fila ona mai Timor-Leste. Ho razaun hirak ne’e mak parte Flinders University interese tebes hodi husu Odile Ruijs atu halo vizita kortezia mai iha FDCH hodi explora oportunidade no posibilidade nune’e sira nia parte bele apoiu nesesidade rekursu umanu iha Timor-Leste liu-husi FDCH.
Diretór Ezekutivu FDCH, Júlio Aparício agradese ba prezensa ekipa ne’e nian no iha esperansa katak Flinders University ho FDCH bele servisu hamutuk hodi fasilita timoroan sira bele ba hala’o estudu iha Flinders University liu-liu iha área estudu Gestão de Recursos Hídricos ou Water Resource Management tanba área ida ne’e importante duni ba estadu Timor-Leste iha tempu agora no futuru. (Média-FDCH)