DILI, 14/01/2019, Sekretáriu Ezekutivu Fundo de Desenvolvimento do Capital Humano FDCH Sr. Isménio Martins da Silva akompaña hosi asesora téknika (FDCH), koordenadór sira no xefe departamentu balun realiza enkontru ida ho Prezidente INFORDEPE Sr. Deolindo da Cruz ne’ebé akompaña mós hosi Diretór Jerál Ministériu Edukasaun Juventude no Desportu (MEJD) Sr. Antoninho Pires, ho ninia ekipa hodi ko’alia kona-ba formasaun lian Portugés ba profesór sira durante ne’e.
Sekretáriu Ezekutivu FDCH Sr. Ismenio M. da Silva hatete objetivu enkontru ne’e atu husu INFORDEPE partilla no fahe informasaun kona-ba projetu Formar Mais formasaun lian Portugés ne’ebé durante hala’o hodi fó formasaun ba profesór sira ninia progresu ninia impaktu oinsá.
Projetu formasaun ne’e la’o ho finansiamentu contra partida ne’ebé finansia hosi governu Portugal no Governu Timor-Leste liuhosi Fundo de Desenvolvimento do Capital Humano, signifika bainhira formadór sira mai fó formasaun ba profesór sira Governu Portugal mak selu saláriu ba formadór sira no Governu Timor-Leste selu de’it osan ba alojamentu nian.
Iha enkontru ne’e INFORDEPE informa projetu formasaun lian Portugés durante 2018 konsege implementa ona iha munisipiu 8 inklui RAEOA, no projetu ne’e la’o konsege fó benefísiu ba profesór sira hodi hasa’e liután sira ninia koñesimentu iha lian Portugés, maibé akordu kooperasaun formasaun ne’e ho governu Portugal remata ona iha loron 31/12/ 2018 no ohin loron seidauk iha akordu foun.
Prezidente INFORDEPE Sr. Deolindo da Cruz informa maske to’o ohin loron seidauk iha akordu kontinuasaun maibé foin lalais INFORDEPE halo ona enkontru informal ida ho Institutu Camões no iha tempu besik Governu Timor-Leste ho Portugal sei estabelese akordu kooperasaun kontinuasaun ba programa formasaun ne’e.
Projetu formasaun ne’e lori mós impaktu ne’ebé pozitivu ba profesór sira hodi hadi’a liután sira ninia koñesimentu iha area hanorin nian ba estudante sira.
Entretantu Diretór Jerál MEJD Sr. Antoninho Pires informa polítikamente projetu formasaun lian Portugés sei kontinua tanba foin lalais iha ona ekipa ida dezloka ba Portugal hodi halo diskusaun kona-ba kontinuasaun projetu formasaun ne’e iha Timor-Leste.
Hafoin rona tiha aprezentasaun, Sekeretáriu Ezekutivu FDCH Sr. Isménio Martins da Silva hatete FDCH kontinua prontu atu finansia programa ne’e no iha orsamentu 2019 preve mós orsamentu ba atividade formasaun ne’e hodi hasa’e liután profesór sira ninia kapasidade iha lingua Portugés. (Media FDCH)