Díli, 17/02/2020 Diretora Ezekutiva (DE) Fundo de Desenvolvimento do Capital Humano (FDCH) Sra. Leila Carceres dos Santos simu iha ninia Gabinete Embaixadór Timor-Leste (TL) ba Reinu Unidu Sr. Gil da Costa hodi troka informasaun kona-ba dezenvolvimentu rekursus umanus Timor-Leste nian durante ne’e.
Diretora Ezekutiva FDCH Sra. Leila Carceres apresia ho disponibilidade embaixadór nian ne’ebé hakat mai iha FDCH hodi rona no buka hatene kona-ba dezenvolvimentu rekursus umanus Timor-Leste nian.
Iha enkontru Diretora Ezekutiva FDCH aprezenta servisu no programa sira ne’ebé FDCH iha no aprezenta mós dokumentu sira ne’ebé FDCH prodús hanesan Livru Analiza no Mapeamentu Dadus Rekursus Umanus iha Setór públiku Timor-Leste nian, Livru Levantamentu Dadus Rekursus Umanus Nasionál no Livru Avaliasaun ba servisu FDCH nian.
Embaixadór Timor-Leste ba Reinu Unidu Sr. Gil da Costa konsidera servisu FDCH nian importante tebes iha area dezenvolvimentu rekursus umanus, tanba ne’e molok atu ba hala’o servisu nudár diplomata presiza iha mós koñesimentu kona-ba progresu no planu dezenvolvimentu rekursus umanus Timor-Leste nian ohin loron no ba futuru.
Embaixadór Timor-Leste ba Reinu Unidu Sr. Gil da Costa simu pose husi Prezidente Repúblika Sr. Francisco Guterres Lú-Olo iha loron 28/01/2020 hodi sai hanesan embaixadór ba Reinu Unidu hamutuk ho embaixadór na’in 8 seluk ne’ebé sei ba halo misaun nu’udar diplomata iha país amigo sira.
Akompaña mós Diretora Ezekutiva iha enkontru ho embaixadór ne’e mak Asesora FDCH Sra. Ana Paula dos Santos, Koordenadór GASEPA Sr. Aderito Soares, Koordenadór GAPLO Sr. Eusebio Barreto no Xefe Departamentu DERHI Sr. Virgilo Ramos. (Média FDCH)