Dili,21 Novembro 2022, Diretór Ezekutivu Fundo de Desenvolvimento do Capital Humano(FDCH) Dr. Cristovão dos Reis reprezenta Sua Exelensia Ministru Ensinu Superior Siénsia no Kultura Sr. Longuinhos dos Santos hodi  hala’o despedida ho estudante bolseirus hamutuk na’in hitu nulu resin lima (75) ne’ebé sei aranka ba hala’o sira ninia estudu iha Portugal no Brazil iha Salaun Delta Nova.

Bolseiru na’in 75 ne’e mai husi bolseiru Bolsa Méritu na’in 30 no bolseiru Bolsa Dosentes na’in 45, bolseiru sira sei ba hala’o sira ninia estudu iha  nivel lisensiatura (S1) Mestradu (S2) no Doutoramentu (S3), no orsamentu ne’ebé preve hodi finansia bolsa ne’e ho montante $.777,006.00.

Partisipa iha serimónia depedida ho bolseiru sira ne’e, Embaixador Brazil ba Timor-Leste Sr.  Mauricio Medeiros de Assis, embaixadora Portugal ba Timor-Leste Sra. Manuela Barios, Reitór no vise reitór balun, Diretór no Asesor sira husi MESCC, Vice Prezidente INCT,  Secretariu Ezekutivu Komisaun Nasional Timor-Leste ba UNESCO,  Diretór Nasionál sira husi ST-FDCH, família bolseiru sira,  no ekipa teknika sira.

Diretór Ezekutivu FDCH, Dr. Cristovão dos Reis ne’ebé reprezenta  Ministru Ensinu Seperiór Siénsia no Kultura hatete serimónia ohin importante tebes, tanba marka inísiu ba dezlokasaun ba bolseiru sira FDCH nian ne’ebé lakleur tan sei ba to ‘o iha Portugál no Brazíl atu kontinua sira nia estudu. Tanba ne’ e, hanesan loron ksolok nian ida ba ita hotu, tanba reprezenta ona klibur ida husi sidadaun timoroan sira ne’ebé sei hetan asesu ba formasaun kualidade iha país sira CPLP nian iha área importante sira ne’ebé mak bele asigura sustentabilidade país nian iha futuru.

Hakarak mós atu husik hela liafuan espesiál ida ba dosente sira hotu husi Instituisaun Ensinu Superiór privada nian ne’ebé mak sei iha oportunidade atu hadia’a sira nia kompeténsia siénsia no mós bele hadi ‘a kompeténsia iha lian portugés. Susesu husi imi-nia estudu sira sei kontribui makas liu tan ba futuru atu hadi’ a kualidade prosesu ensinu no aprendizajen nian no atu hadi ‘a kualidade ensinu superiór iha jerál, hodi kumpri lema Ministériu Ensinu Superiór, Siénsia no Kultura nian: “Kualidade formasaun maka futuru Nasaun nian”.

Atribuisaun ba bolsa estudu hirak ne’e hanesan investimentu ida, ho sentidu estratéjiku, liu-liu formasaun ba profesór sira no kapasitasaun rekursu umanu iha área prioritária sira. Ezemplu, investimentu iha kualifikasaun dosente sira nian mak formasaun ida ho rezultadu multiplikadór, tanba hadi’a kualifikasaun dosente sira nian sei iha impaktu hodi hadi’a sira nia estudante sira nia kbi’it ka kapasidade iha futuru.

Nune ‘e, husu ba bolseiru sira hotu ne’ebé bainhira to ‘o iha Universidade sira ne’ ebé mak hein hela iha Portugal no Brazíl, kontinua estuda ho empeñu no dedikasaun boot tebes atu hetan susesu, tanba imi sei sai hanesan embaixadór akadémiku mak reprezenta ita-nia nasaun nian, imi-nia rezultadu sei hetan influénsia iha imajen estudante timoroan sira nian.

Ha ‘u hakarak atu hato’o susesu barak ba imi-nia perkursu akadémiku atu kontinua kontribui ativamente ba dezenvolvimentu ita-nia Nasaun nian tuir meta sira ne’ebé prevee ona iha Planu Estratéjiku Dezenvolvimentu Nasionál tinan 2011-2030.

Ikus liu, ha ‘u hakarak agradese serbisu ne’ ebé tékniku FDCH nian sira hala ‘o ona, ekipa juri no formadór sira ne’ebé mak ho sira nia servisu no maske hasoru difikuldade sira konsege finaliza prosesu ida ne’e, ne’ ebé sei fó dalan ba bolseiru foun sira husi nasaun CPLP nian. (Média_FDCH)

Related Post :


Total Viewer : 44 Views || Category: Notisia