Diretór Ezekutivu ba Fundo de Desenvolvimento do Capital Humano (FDCH ), Júlio Aparício halo viajen servisu ba Indonézia hahú husi loron 6- 9 maiu 2024 hodi sai sasin ba estabelesimentu kooperasaun tékniku entre Ministériu Saúde ho univesidade sira iha Indonézia ne’ebé sei simu timoroan sira ba hala’o sira ninia estudu iha nasaun vijinu ne’e.
Memorandum entendimentu ne’ebé Ministériu Saúde selebra mak ho Reitór hosi Universidade UGM, AIRLANGGA no Institut Ilmu Kesehatan Kediri iha Indonézia hodi hametin kooperasaun tékniku iha área kapasitasaun profisionál saúde nian.
Memorandu entendimentu ne’e asina husi Sua Exelénsia Vise-Ministru Fortalesimentu Institusionál Saúde, José dos Reis Magno ho Reitór husi Univeridade sira. Nune’e mós assinatura akordu implementasaun téknika ne’ebé asina husi Institutu Nasionál Saúde Públika Timor-Leste (INSP-TL) ho Dekanu husi Fakultas Kedokteran, Kesehatan Masyarakat dan Keperawatan UGM, nian Dekanu Fakultas Kesehatan Masyarakat UNAIR-Surabaya nomós Institut Ilmu Kesehatan husi Kediri iha área Tékniku Laboratóriu.
Institutu Nasionál Saúde Públika Timor-Leste hala’o akordu kooperasaun tékniku ho Universidade sira hanesan: Univesitas Gajah Mada-UGM Yogyakarta ba área Doutoramentu iha Saúde Públika, Mestradu iha Siénsia Medisina Tropikál espesialmente iha área Parasitologia, Mestradu iha programa Siénsia Médika, iha área Molecular Medicine, Mestradu iha programa Siénsia Médika iha área Histologia no Biolojia.
INSP-TL nafatin elabora posibilidade seluk iha área epidemiolojia nian, liuhusi “Field Epidemiology Training program”. Iha parte seluk atu selebra mós akordu tékniku ho Universidade Airlangga Surabaya Indonézia iha área Doutoramentu Saúde Públika, Mestradu iha Nutrisaun, Ocupational Health, Saúde Materno Infantil, no Saúde Ambiental. Nune’e mos Institut Ilmu Kesehatan Kediri iha area Tékniku Laboratóriu.
Hafoin asina akordu ho Universidade sira, ekipa mós hala’o monitorizasaun ba estudante bolseiru Timoroan sira ne’ebé agora dadaun hala’o estudu iha Universidade Airlangga-UNAIR Surabaya nomós IIK-Kediri Indonézia. Iha prosesu monitorizasaun ne’e ekipa hetan aprezentasaun detalllu kona-ba progressu iha sira-nia estudu husi kada universidade nomós rona diretamente estudante sira-nia preokupasaun ne’ebé sira enfrenta.
Ministériu Saúde nu’udar ministériu ne’ebé akreditadu iha FDCH, hahú husi ejisténsia FDCH iha 2011 mai to’o ohin loron, haktuir ba prioridade Governu da-sia nian atu reforsa servisu saúde nian, FDCH kontinua finansia hodi fó oportunidade ba timoroan sira hodi ba hasa’e sira nia estudu iha área espesialista saúde nian sira hodi presta servisu ho di’ak liutan nune’e bele hamenus tranferesnia pasiente sira ba rai li’ur.