20/12/2019. Diretora Ezekutiva Fundo de Desenvolvimento do Capital Humano (FDCH),Sra. Leila ML.Cárceres dos Santos ne’ebé akompaña mós husi funsionáriu Gabineti Aprovisionamento e Logistica (GAPLO) Sr. Isidoro de Vasconselhos partisipa iha Semináriu ba Rádio Komunitária ho tema “importansia Media Komunitariu ba Prosesu Dezenvolvimentu” . Iha oportunidade ne’e Diretora Ezekutivu FDCH Sra. Leila ML. Cárceres dos Santos sai mós núdar orador iha seminariu ne’e hodi koalia kona-ba papel husi FDCH.

“Papel importante ida husi FDCH mak atu buka tuir, atu halo analize ida katak ita nia rekursu ne’e to’o iha ne’ebé ona, ezistente ne’e to’o iha hira, ita falta iha área ida ne’ebé,” Hatete Diretora Ezekutiva FDCH Sra Leila ML. Cárceres dos Santos durante seminariu.

Diretora Ezekutiva ne’e hato’o mós FDCH nia hanoin balun liliu ba área Jornalismu nian, tuir Diretora Ezekutiva katak papel husi jornalista importante tebes no tama mós iha área importante.

“FDCH nia hanoin, liliu ba área jornalismu sira, ba jornalista, ita bot sira nia papel ne’e importante tebtebes, i tama mós iha área ida ne’ebé que importante iha Nasaun ita nian, atu bele dehan katak ita boot sira ne’e hanesan portavos Nasaun nian maske ita boot sira iha komunidade, maibe mós fo impaktu maka’as atu bele hala’o ita nia dezenvolvimentu nasional nian, bele mós fo sai to’o iha liur, tanba ita haree planu governu nian katak, ba tinan oin mai ne’e governu iha hanoin atu halo desentralizasaun, entaun papel ita bot sira nian ne’e importante tebtebes”. katak Diretora Ezekutiva FDCH Sra Leila ML. Cárceres dos Santos.

Antes hakotu nia intervensaun n’udar oradora iha seminariu ne’e, Diretora Ezekutiva FDCH hato’o mós nia sujestaun balun ba SECOMS atu bele haree katak ba sira ne’ebé mak hala’o sira nia knar núdar jornalista, tenki reforsa ona, organizasaun jornalista sira nian, ho nune’e pelumenus bele iha netik bukae balun hodi bele kaer, atu nune’e jornalista sira iha radio komunidade sei la hala’i hotu hodi buka servisu seluk.

Remata seminariu aproveita fahe mós sertifikadu ba formandus sira ne’ebé mak durante fulan ida nia laran partisipa ona formasaun iha área jestaun no rekursu umanu (jornalista radio komunidade nian) ne’ebé organiza husi Asosiasaun Jornalista Timor Lorosa’e (AJTL) liu husi kooperasaun ho Direção Nasional Centro Radio Comunidade (DNCRC) no hetan finansiamentu husi Fundo de Desenvolvimento do Capital Humano (FDCH).

Atividade Seminariu no fahe sertifikadu ba formandu sira ne’e realiza iha salaun enkontru Igreja Maubisse.

Partisipa mós iha atividade ne’e mak Prezidenti Konsellu Imprensa Sr. Virgilio Guterres, Diretor DNCR Sr. Abel da Conceição no mós nia equipa, Prezidenti AJTL Sr. David Hugo no estrutura AJTL, Madres no mós jestor no jornalista radio komunidade munisipiu hotu no autoridade lokal Maubise nian. (Media FDCH)

Related Post :


Total Viewer : 1459 Views || Category: Notisia