Díli,16/05/2019, Eis Titular  S.E. Dr.  José Ramos-Horta halo vizita  ida mai Sekretariadu Tékniku Fundo de Desenvolvimento do Capital Humano  (ST-FDCH) hodi hatene progresu servisu  no iha tempu hanesan rekolla mós dadus kona-ba dezenvolvimentu rekursus umanus pais ne’e nian hahú hosi FDCH ninia ejistensia iha 2011 to’o mai ohin loron..

Vizita Eis Prezidente Replublika   S.E. Dr.  José Ramos-Horta ne’e simu direita hosi Sekretáriu Ezekutivu ST-FDCH Sr. Isménio Martins da Silva  ne’ebé reprezenta Ministru MESCC tanba ministru iha asuntu importante seluk.

“Objetivu prinsipál hosi vizita ne’e, alende atu haree besik liu-tan servisu ST-FDCH nian, Premiadu Nobel da Paz ne’e mós hakarak hatene dadus rekursu umanus Timor-Leste nian ne’ebé durante ne’e FDCH iha haktuir responsabildade servisu ne’ebé preve ona iha Lei númeru 12/2011”. Haktuir Sekretáriu Ezekutivu FDCH Sr. Isménio Martins da Silva

José Ramos Horta louva ho servisu ne’ebé durante ne’e FDCH halo tanba ne’e ninia prezensa ba dala uluk mai iha ST-FDCH atu halibur dadus rekursus umanus nasaun foun ne’e nian  hodi fahe ba mundu internasional.

“Ha’u nia vizita mai iha Ministeriu Ensinu Superior Siensia e Kultura liu-liu  iha  Fundo de Desenvolvimento do Capital Humano ida ne’e, hakarak simu informasaun liutan nudár sidadaun, nudár eis Prezidente, nudár lider ida maske agora la iha governu, dala barak iha fatin ne’ebé ne’ebé ha’u ko’alia liu-liu buka esplika ba komunidade internasional progrseu ne’ebé Timor-Leste iha,”hatete Eis Prezidente Republika ne’e.

Ramos Horta subliña kuandu  ko’alia kona-ba progresu, importante tebe-tebes rekursus umanus no  dezenvolvimentu umanu.

“Dala barak ha’u ko’alia iha li’ur, ha’u temi bebeik Fundu de Desenvolvimento do Capital Humano ninia relatoriu ne’ebé maun boot Xanana Gusmão lansa iha Merkadu lama iha tinan rua liuba, nia rezultadu  ema hotu hotu empresionadu,”  Haktuir Premiadu Nobel da Paz ne’e.

José Ramos Horta mós husu ba governu atu mantein investimentu iha kapital umanu hodi forma timoroan sira ho ninia abilidade no kapasidade ne’ebé di’ak hodi kontribui ba dezenvolvimentu nasaun nian.

“Ha’u sei hatete ba governu atu mantein programa ne’e, investimentu iha kapital umanu la’ós investe tinan lima tinan sanulu de’it maibe presiza iha ninia kontinuasaun,” Hatete José Ramos- Horta

Entretantu Sekretáriu Ezekutivu FDCH Sr. Isménio Martins da Silva sente honradu ho vizita eis titular Dr. José Ramos Horta nian.

Durante sorumutu, FDCH aprezenta mós sistema dadus benefisiáriu ne’ebé prodúz hosi FDCH ho naran BMIS ( Beneficiries Management Information System) ba Eis titulares ne’e , ne’ebé aprezenta hosi  Xefe Departamentu Sistema no Informasaun  (DESTI) Sr. Ivo Belo, iha ninia parezentasaun hatete sistema BMIS ne’e  bele grava dadus benefisiáriu hotu ne’ebé finansia husi FDCH no fasilita hodi  fornese relatóriu benefisiáriu sira ho  efiesiensi liu no akuradu.

Hafoin hare aprezentasaun sistema BMIS Eis Prezidente da Repúblika ne’e orgullu ho servisu FDCH nian no promete sei informa progresu dezenvolvimentu rekursus umanus ba komunidade internasionál liuhosi diskursu sira.

Iha oportunidade ne’e Sekretáriu Ezekutivu FDCH Sr. Isménio Martins da Silva simbólikamente entrega mós dokumentu sira ne’ebé durante ne’e FDCH prodús ona ba Dr. José Ramos-Horta.(Media FDCH)

Related Post :


Total Viewer : 3099 Views || Category: Notisia