DILI,14/06/2017 (FDCH) Funsionáriu públiku rekrutadu tinan 2013-2015 hamutuk na’in 250 husi liña ministériu no instituisaun sira  estadu nian hamutuk  16 tuir Kursu Indusaun obrigatiro durante loron tolu ne’ebé organiza husi Instituto Nacional da Administração Pública (INAP) no finansia husi Fundo de Desenvolvimento do Capital Humano (FDCH).

Diretor Jeral  INAP Sr,  Agostino Letencio, hateten kursu ne’e ninia lala’ok obrigatóriu bazeia ba dekretu lei Funsaun Públiku   númeru 38/2012 artigu 20  ne’ebé hatuur ona.

“Kursu ida ne’e nia lala’ok obrigatóriu ne’ebé mak ita hatuur ona iha dekretu lei 38/2012 iha artigu 20 ko’alia kona-ba kursu Indusaun e uma curso obrigatóriu, ne’ebé hala’o emidiatamente antes hahú ita nia misaun hanesan funsionáriu públiku, maibé ita hotu rekoñese katak ita boot sira balun mai tiha ona iha 2014 no 2015 no balun hetan ona kargu hanesan xefe departamentu no diretór,” hatete Diretor Jeral  INAP Agostino Letencio iha diskursu ba abertura kursu ne’e iha salaun Esperansa Aimutin.

Diretór jerál ne’e hatete kursu ne’e obrigatóriu tanba Funsionáriu Públiku sira atu hahú sira nia servisu sira tenke hatene uluk sira nia direitu no devér oinsá no benefisiu saida mak bele hetan bainhira servisu hanesan funsionáriu estadu nian no  kursu ne’e fó biban mós  ba funsionáriu sira atu hatene didi’ak saida mak sira bele halo no saida mak labele halo.

“Funsionáriu públiku hotu-hotu iha direitu atu tuir formasaun 40 oras kada tinan hodi hadi’a sira nia abilidade servisu,” dehan Sr. Agostino   

Entretantu Sekretáriu Ezekutivu Fundo de Desenvolvimento do Capital Humano (FDCH) Sr, Isménio Martins da Silva ne’ebé partisipa iha serimónia abertura ne’e hatete FDCH sei kontinua investe maka’as orsamentu ba INAP atu haforsa liután kualidade formador sira hodi fó formasaun ba funsionáriu públiku sira.

“FDCH kontinua investe orsamentu maka’as iha INAP atu reforsa maka’as liután kualidade formador sira hodi dezenvolve matéria formasaun ho di’ak no para bele asegura liután  mákina estadu atu dezenvolve servisu iha mákina estadu ho di’ak liután,”hateten Sr. Isménio Martins

Sr. Isménio Martins da Silva hatete ba oin funsionáriu ne’ebé tuir ona kursu indusaun no iha valor di’ak no hetan rekomendasaun atu tuir formasaun iha rai li’ur no rai laran tenke mai ho ninia istória no rekomendasaun husi Komisaun Funsaun Públiku.

FDCH mós husu ba liña ministériu sira atu fó oportunidade ne’ebé hanesan ba funsionáriu sira atu ba tuir formasaun iha rai li’ur tanba formasaun ba rai li’ur tenke fó oportunidade hanesan ba funsionáriu hotu-hotu.

Kursu obrigatóriu ne’ebé hala’o durante loron tolu ne’e formador sira mai husi INAP rasik  no mós husi Komisaun Funsaun Públiku.

Funsionáriu sira ne’ebé tuir kursu ne’e mai husi liña ministériu no instituisaun estadu nian hamutuk  16 no funsionáriu ne’ebé tuir formasaun hamutuk 250  hanesan Comissão Nacional de Eleições (CNE) funsionáriu na’in 3 Gabinete Primeiru Ministru funsionáriu na’in 5, Instituto de Apoio ao Desenvolvimento Empresarial (IADE) na’in 5, Ministériu Administrasaun Estatal na’in 33, Ministeriu Comercio Industria no Ambinete na’in 8, Ministerio do Interior na’in 20, Ministerio do Estranjeiro e Coperasaun na’in 4, Ministeriu Obras Públiku Tranasporte e Comunicacão na’in 94, Ministerio Planeamentu no Investimentu Estratejiku na’in 1 Ministerio Petroliu no Rekursu Minerais na’in 10, Ministériu Solidariedade Sosiál na’in 19, Presidencial do Conselho Ministru (PCM) na’in 2, Programa Nasionál Desenvolvimento Suco (PNDS) na’in 18, Serviço autonomo de Medicamento e Equipamentus de Saúde (SAMES) na’in 17, Secretariadu Politika Formasaun Profesional no Emprego SEPFOPE na’in 2 no funsionáriu husi Universidade Nasional Timor-Lorosa’e (UNTL) na’in 9.(Média FDCH)

Related Post :


Total Viewer : 1292 Views || Category: Notisia