Dili, 17 Janeiru 2024, Diretór Ezekutivu ba Fundo de Desenvolvimento do Capital Humano (FDCH), Júlio Aparício akompaña husi Diretór Nasionál Koordenasaun ba Ezekusaun Programa , Projetu no Jestaun ba Sistema Informasaun (DNKEPPJSI), Francisco Sarmento realiza enkontru ho Adidu Edukasaun Indonézia ba Timor-Leste, Ikfan Haris ho ekipa, iha gabinete Diretór Ezekutivu, Palacio do Governo.
Objetivu husi enkontru ne’e hodi hala’o diskusaun kona-ba posibilidade kooperasaun entre FDCH ho Embaixada Indonézia iha Timor-Leste liu-liu iha area bolsa estudu ne’ebé Governu Indonézia oferese ba timoroan sira liu husi sira ninia embaixada.
Adidu edukasaun Ikfan Haris, hato’o difikuldades bolseiru sira nian ne’ebé bolseiru sira hasoru no husu FDCH nia apoiu ba parte Finanseiru nian hodi apoiu bolseiru sira ne’ebé hetan ona bolsa maibe kansela tanba problema osan viajen nian. Aliénde ne’e embaixada Indonézia iha Timor-Leste mós prontu atu servisu hamutuk no hametin kooperasaun ne’ebé di’ak liutan ho FDCH iha futuru.
Diretór Ezekutivu FDCH agradese ba apoiu Embaixada Indonézia nian no kontinua iha komitmentu atu servisu hamutuk no mantein kooperasaun ida di’ak liu entre parte rua iha programa bolsa estudu ba timor oan sira, maske durante ne’e embaixada la oferese bolsa estudu kompleta maibe fasilita ona timoroan balu. Husi sorumutu ida ne’e FDCH sei servisu hamutuk ho embaixada hodi fó bolsa estudu ba timoroan sira ho oportunidade ne’ebé hanesan.
Indonézia nu’udar país amigu ne’ebé durante ne’e oferese bolsa estudu oi-oin ba timoroan sira no Indonézia nu’udar mós país vizinu ne’ebé timoroan barak hili hodi kontinua sira ninia estudu ho finansiamentu rasik husi inan aman.
(Média-FDCH)