Dili, 04/03/2019 Sekretaraidu Tékniku Fundo de Desenvolvimento do Capital Humano (ST-FDCH)  realiza atividade diseminasaun informasaun kona-ba Regras no Prosedimentus  Ezekusaun Orsamentu Jeral Estadu (OJE) 2019  ba  dezenvolvimentu rekursus umanus nasaun foun ne’e nian iha área formasaun no bolsa estudu ba liña Ministeriál no instituisaun estadu akreditadu sira hamutuk 52.

Atividade diseminasaun ne’ebé hala’o durante loron sorin  ne’e realiza iha salaun Enkontru INFORDEPE Balide, ne’ebé partisipa hosi Diretór Jeral balun, Diretor Rekursus umanus no pontu fokál sira  hosi Liña Ministeriál no Instituisaun Estadu Akreditadu sira.

Sekretáriu Ezekutivu  FDCH Sr. Isménio Martins da Silva hatete tinan-tinan wainhira hahú tinan fiskal ba ezekusaun, ST-FDCH tu’ur hamutuk ho Liña Ministeriál no instituisaun akreditadu  sira hodi partilla prosedimentus foun ka regras ezekusaun ba orsamentu FDCH nian haktuir mós ho Lei númeru 02/2019, 07 Fevreiru, no Dekretu Governu ne’ebé aprova OJE 2019.

“Ita hahú ona ezekusaun ba Orsamentu Jeral Estadu, FDCH iha tinan ne’e ho orsamentu $20 milloens, atu bele asegura liutan, garante liutan kualidade ezekusaun importante ita tuur hamutuk ho liñas Ministeriais hodi haree ba planu, prosedimentu hodi hamosu kualidade iha ezekusaun, tanba tinan tinan ita tenta atu reve programa sira ne’e, halo avaliasaun hetan orientasaun hosi Ministru Ensinu Superior Siensia no Kultura ho Primeiru Ministru atu haree politika ho kualidade,” dehan Sekretariu Ezekutivu FDCH Sr. Ismenio Martins da Silva

Atividade ne’e hala’o bazeia ba mandatu ne’ebé atribui ba ST-FDCH,  haktuir iha Artigu 2o, Decreto-Lei no 12/2011, 23 de Marsu, alteradu no repúblikadu ho Decreto-Lei no 11/2015, 03 de Juñu, katak papel ST-FDCH maka atu koordena no fasilita ho instituisaun estadu no públiku tomak ba dezenvolvimentu rekursus umanus iha Timor-Leste.

Liuhosi simplifika no uniformaliza, padroniza métodus no rutina servisu relativa ba jestaun ezekusaun orsamentu FDCH ho forma integradu, atu hetan transparensia, efikasia no efisiensia no utilizasaun orsamentu ho loloos no iha rezultadu haktuir prioridades nasaun nian.

Bazeia ba mandatu ne’e, ST-FDCH iha obrigasaun atu servisu metin liu tan ho Liña Ministeriál (LM) sira ne’ebé hetan assesu ka akreditadu ba orsamentu FDCH nian iha OJE 2019, hodi garante kualidade ezekusaun nomós rezultadu programa ida ne’ebé di’ak.

Durante soru-mutu ekipa ST-FDCH ne’ebé kompostu hosi Sekretáriu Ezekutivu FDCH Sr. Isménio Martins da Silva ho Koordenadór sira partilla mós servisu prinsipál FDCH nian durante ne’e no  prosedimentu ho regra sira ezekusaun orsamentu ba atividade bolsa estudu no formasaun tanba iha liña Ministeriál no Instituisaun Estadu lubuk ida maka foin atu asesu ba orsamentu FDCH nian iha tinan ne’e.

Hafoin aprezentasaun iha parte diskusaun diretór no pontu fokál balun sujere mós atu haforsa  liután koordenasaun servisu iha parte tékniku nian entre FDCH no Liñas Ministeriais no Instituisaun Akrediatdu sira hodi kontribui ba dezenvolvimentu rekursus umanus nasaun foun ne’e nian.

Entretantu Pro-Reitor Asuntu Kooperasaun Universidade Nasionál Timor Lorosa’e (UNTL) Aniceto Serrão hatete durante ne’e FDCH ho UNTL iha kolaborasaun ida di’ak tebes tanba UNTL nu’udar instituisaun akreditadu ida ba iha bolsa estudu ninian.

Hosi soru-mutu ne’e, ST-FDCH hein katak liñas ministeriais ho instituisaun akreditadu sira sei komprende liután regras ba pagamentus ne’ebé eziste iha FDCH, hodi nune’e bele fasilita liu-tan sira, atu dezempeña di’ak liu tan ezekusaun ba  programas planu no orsamentu ne’ebé preve ona.(Media FDCH)

Related Post :


Total Viewer : 767 Views || Category: Notisia