Dili, 16 Janeiru 2024. Sekretariadu Tékniku Fundo de Desenvolvimento do Capital Humano (ST-FDCH) realiza enkontru ho Liña Ministeriál no Instituisaun estadu akreditadu sira hamutuk sanulu resin-neen (16) hodi aprezenta progresu ezekusaun orsamentu 2023 no distribui pakote orsamentu 2024 iha programa bolsa estudu no formasaun nian, iha salaun Knowledge Center Palácio do Governo.
Objetivu husi enkontru ne’e hodi aprezenta ba Liña Ministeriál no Instituisaun Estadu Akreditadu sira kona-ba progresu ezekusaun orsamentu 2023 no pakote orsamentu FDCH 2024 hodi finansia programa formasaun no bolsa estudu.
Diretór Ezekutivu FDCH, Júlio Aparício iha ninia introdusaun hatete, iha tinan 2023 Orsamentu FDCH ho montante millaun $18.2 ninia ezekusaun atinje porsentu 94.42% ne’e katak FDCH ninia ezekusaun di’ak tanba ho servisu hamutuk ne’ebé di’ak entre parte hotu.
Diretór Ezekutivu FDCH apresia ho servisu hamutuk ne’ebé durante ne’e iha no husu nafatin ba Liña Ministérial no Instituisaun Estadu Akreditadu sira, atu ezekuta orsamentu 2024 ho kualidade tuir programa no planu ne’ebé submete ona mai iha FDCH hodi melloria kualidade rekursus umanus iha ita ninia país.
Orsamentu FDCH ba 2024 ho montante millaun $16.4 ne’ebé sei finansia programa haat hanesan Programa Formasaun Profisionál ho orsamentu $1,154,000.00, Formasaun Téknika $3,713,970.62, Bolsa Estudu $9,870,897.38 no Funsionamentu no dezenvolvimentu Institusionál ho orsamentu $1,661,800.00.
Durante enkontru , Diretór Nasionál sira iha FDCH hanesan; Diretóra Nasionál Servisu Pagamentu (DNSP), Alexandrina da C. Viegas halo aprezentasaun kona-ba taxa ezekusaun orsamentu 2023 husi Liña Ministériál no Instituisaun Estadu Akreditadu mai FDCH, Diretór Nasionál Kordenasaun, Ezekusaun Programa, Projetu no Sistema Informasaun (DNCEPPGSI), Francisco Sarmento halo aprezentasaun kona-ba Kriteria bolsa estudu no programa buka tuir benefisiariu, Profisionál Espesializadu Diresaun Nasionál Planu Peskiza, Monitorizasaun no Fiskalizasaun (DNPPMF), Hermenegildo da Silva halo aprezentasaun kona-ba planu programa sira ne’ebé liña ministerial no instituisaun estadu akreditadu sira submete mai FDCH. no Profisionál Espesializadu Diresaum Nasionál Aprovizionamentu (DNA), Eusebio A.G. Barreto halo aprezentasaun kona-ba servisu sira aprovizionamentu iha ST-FDCH.
Enkontru ne’e termina ho distribuisaun pakote orsamentu 2024 husi FDCH ba Diretór Jerál, Diretór Rekursus Umanus no pontu fokal sira husi liña Ministériál no Instituisaun estadu akreditadu sira ne’ebé partisipa iha eventu ne’e. (Média_FDCH)