MALYSIA, 11/8/2017 (FDCH)Fundo de Desenvolvimento do Capital Humano FDCH- ho Sekretária Formasaun Profisionál no Empregu SEPFOPE halo fiskalizasaun ba Sentru formasaun Newera Automotive Academy Malaysia hodi haree direita formasaun ba timoroan na’in tolu ne’ebé foin lalais governu haruka sira ba tuir formasaun durante fulan neen iha rai Malaysia.
Objetivus Prinsipal ba fiskalizasaun ne’e mak atu halo fiskalizasaun direita ba iha sentru formasaun Newera Automotive Academy Malaysia.
Durante iha Malaysia ekipa delegasaun hala’o vizita ba fatin Centru Formasaun “Newera Automotive Academy” hodi haree direita ba fatin (Ofisina), kondisoéns, no ekipamentu sira no rona apresentasaun husi “Business Department Manager” Sr. Alex Tiu kona-ba profile kompania, no progresu desenvolvimentu NEWERA AUTOMOTIVE ACADEMY.
Hafoin halo tiha vizita ba sentru formasaun ekipa delegasaun hasoru malu mós ho Embaixadora Timor-Leste iha Malaysia, hodi informa formadus na’in tolu ne’ebé tuir formasaun ne’e ba embaixada Timor-Leste, Sra. Olandina Cairo.
Iha hasoru malu ne’e embaixadora husu ba SEPFOPE no FDCH no Instituisóens sira karik lori ema mai iha Kerajaan Malaysia tenke aproveita iha akordu Governu hó Governu (G to G), nune bele fasilita estudantes sira no labele akontese deportasaun.
Ekipa delegasaun direitamente ba fatin apartementu (hela fatin) ne’ebé mak formadu sira hela ba, normalmente hela fatin sufisientes no loron-loron veiklu kompania tula ba mai ba fatin formasaun.
Programa formasaun automotive ne’e realiza hosi Sekretaria Estado Polítika Formasaun Profesional no Empregu (SEPFOPE) no hetan apoiu orsamentu hosi FDCH ho montante $28,330 hodi fasilita timoroan na’in tolu mak ; Sr. Romenio Claver Bendito Fatima Guteres Amaral, Sr. Joao Martins, Sr. Simon Pedro Cuca durante fulan neen iha Malysia bazeia ba “Cooperative agreement” entre SEPFOPE no TIVA MOTOR Unipessoal, LDA, Bemori Dili -Timor –Leste. (Media FDCH)