Díli, 24/07/2019 Sekretáriu Ezekutivu Fundo de Desenvolvimento do Capital Humano (FDCH) Sr. Isménio Martins da Silva akompaña hosi Xefe Departamentu Peskiza Sr. Hermengildo da Silva halo enkontru ida ho Sekretáriu Estadu ba Protesaun Sivíl S.E. Sr. Alexandrino Xavier Araújo ho Diretor Jeral Servisu Operasaional no Protesaun Sivil Sr. Ismael da Costa Babo iha Gabinete Sekretáriu Estadu nian iha Caicoli.
Objetivu enkontru ne’e hodi koordena planu programa no ko’alia mós kona-bá posibilidade oinsá atu aloka ketak orsamentu kona-ba kapasitasaun no formasaun nian ba servisu protesaun sivíl tanba ohin loron orsamentu sei konsentra hamutuk iha Ministériu Interior.
Sekretáriu Ezekutivu FDCH Sr. Isménio Martins da Silva hatete servisu protesaun sivíl nian importante tebes iha públiku tanba ne’e presiza koloka ninia orsamentu rasik hodi bele foku iha área formasaun no kapasitasaun ne’ebé ho espesífiku ba funsionáriu sira.
Entretantu Sekretáriu Estadu Protesaun Sivíl S.E. Sr. Alexandrino Xavier Araujo apresia ho prezensa Sekretariu Ezekutivu FDCH nian hodi ko’alia kona-ba programa formasaun ba funsionáriu sira.
“Ha’u husu para 2020 ami nia osan tau ketak no ha’u kontente tebes rona Sr. Sekretáriu Ezekutivu husu atu ami prepara palanu atu hato’o ba FDCH,” hatete Sr. Alexandrino Xavier Araujo
Sekretáriu Estadu ne’e informa mós programa prioridade iha ninia mandatu iha haat hanesan (1.Estabelesimentu Enkuadramentu legal, (2. Dezenvolvimentu Infraestrutura, (3.Estabelese kooperasaun ho Instituisaun relevantes no (4. Formasaun Espesifiku ba protesaun Sivil.
Tuir planu iha tinan ne’e sei halo mós rekrutamentu ba kadetes Bombeirus hamutuk na’in 60, hafoin halo Rekrutamentu sei iha mós formasaun durante fulan tolu ba kadetes foun sira.
Hafoin rona tiha esplikasaun hirak ne’e Sekretáriu Ezekutivu FDCH Sr. Isménio Martins da Silva hatete FDCH prontu atu asegura programa sira ne’ebé iha hodi kapasita di’ak liután funsionáriu protesaun sivíl sira.
Sekretariu Ezekutivu sujere mós ba Sekretariu Estadu Protesaun Sivíl atu tau iha planu hodi harii mós sentru formasaun rasik nune’e bele habelar liután servisu protesaun sivíl nian ba públiku.( Media FDCH)