Díli, 19/06/2019. Sekretáriu Ezekutivu Fundo de Desenvolvimento do Capital Humano (FDCH) Sr. Isménio Martins da Silva hala’o sorumutu ida ho Konsellu Jestaun Universidade Nasionál Timor Lorosa’e (UNTL), iha salaun enkontru UNTL Díli. Sorumutu durante minutus 45 ne’e ko’alia konabá Planu Orsamentu ba UNTL tinan 2020 inklui programa estájiu profisionál ne’ebé FDCH halo atu destaka graduadus sira tuir ida-idak nia área estudu iha instituisaun públika ka privadas inklui UNTL rasik.
Perante Konsellu Jestaun UNTL ne’ebé kompostu husi Reitor, Pro-Reitor, Administradór Jerál, Dekanu no Kargu Xefia sira, Sekretáriu Ezekutivu FDCH informa planu orsamentu ba UNTL nian sei aumenta iha tinan oin ( 2020).
Aleinde planu orsamentu 2020, Sr. Isménio mós hato’o ba Konsellu Jestaun UNTL sira katak sei destaka estajiáriu na’in 22 ba UNTL iha tempu badak. Estajiarius 22 ne’e sei destaka ba área sira mak hanesan; Matemátika (5), Fízika (3), Kimíka (8), Kontabilidade (1), Administrasaun Públika (1) no Agrikultura (4). Tuir dadus, estajiarius ho total mane 12 no feto 10 remata ona sira estudu husi nasaun Brazil nain 20 no Filipina nain 2.
Reitór UNTL Prof. Dr. Francisco Miguel Martins iha ninia intervensaun hato’o ninia agradesimentu ba FDCH tanba tuir nia, durante ne’e UNTL mós presiza tebetebes rekursus kualifikadus atu apoia servisu sira iha áreas ne’ebé mak mensiona iha leten. Relasiona ho planu orsamentu FDCH nian, Reitór ne’e subliña katak iha tinan 2020 parte UNTL sei haruka tan ninia ema hamutuk 35 atu ba foti kursu Mestradus no Doutoramentu iha nasaun rua mak hanesan Portugal ema 15 no Brasíl ema 20.
Hatán ba ida-ne’e, Sekretáriu Ezekutivu hato’o katak ho orsamentu ne’ebé planeia ona, FDCH prontu responde planu refere iha tinan oin. (Média FDCH)