Dili, 01/02/2019. Sekretáriu Ezekutivu Fundo de Desenvolvimento do Capital Humano (FDCH) Sr. Isménio Martins da Silva halo sorumutu ho Ministru Justisa Sr. Manuel Carceres iha edifísiu Ministériu Justisa, Dili.

Sorumutu ne’e ninia objetivu atu konfirma proposta saláriu formadores nian iha Centro Formação Judiciario (CFJ) no informa planu orsamentu 2019 nian ne’ebé aloka ba Ministériu Justisa.

Tuir Sekretáriu Ezekutivu FDCH katak CFJ halo ona submisaun proposta ba Fundo de Desenvolvimento do Capital Humano kona-bá saláriu formadores CFJ nian durante fulan ne’en (6) nia-laran.

“Ami ohin mai atu hato’o de’it katak FDCH simu ona proposta husi CFJ kona-bá saláriu formadores sira nian durante fulan ne’en”. Dehan Isménio durante introdusaun.

Nia hatutan katak husi parte FDCH seidauk fó resposta ba ida-ne’e (saláriu formadores) tanba agora daudaun sei uza hela orsamentu duo-désimu hodi sustenta mákina estadu para bele funsiona nafatin. Maibé lideransa FDCH ne’e garante sei fo resposta ba iha proposta refere bainhira orsamentu Jeral Estadu (OJE) tinan 2019 hetan ona promulgasaun husi Prezidente Repúblika.

“Ami tau ona konsiderasaun ba proposta sira ne’e, hein katak bainhira Sua Exelensia Prezidente Repúblika promulga ona OJE 2019, hau sente sei iha posiblidade ita bele deskute fali asuntu ida-ne’e”. Haktuir Sekretáriu Ezekutivu FDCH.

Iha sorin seluk Ministru Justisa Sr. Manuel Carceres mós rekoñese katak ho orsamentu duo-désimu seidauk bele responde programa sira. Tan ne’e governante ne’e husu ba FDCH atu bele tau hela konsiderasaun ba proposta refere hodi diskute fila fali bainhira OJE 2019 hetan ona promulgasaun.

“Husu ba Señor Sekretáriu (FDCH) bele tau hela konsiderasaun ba, no ita sei diskute kle’an bainhira orsamentu (OJE) ne’e hetan promulgasaun” Hatán Ministru.

Tuir Ministru Justisa katak programa formasaun ba formadores sira ne’e importante tebe-tebes tanba hodi bele hasa’e kualidade autores judisiál timoroan nian, tanba tuir nia, durante ne’e sétor Justisa sempre hetan krítiku maka’as.

“Formasaun ne’e importante tebes para bele hasa’e kualidade autores judisiál nian, nune’e bele minimiza uitoan krítiku sira ba setór justisa” Haktuir Ministru Justisa.

Rona preokupasoins sira ne’e, Sekretáriu Ezekutivu FDCH promete katak sei asegura programa sira, la’os de’it husi CFJ maibé mós formasaun sira husi Ministériu Justisa tomak, maibé sei la halai se’es husi desizaun Ministru nian no planu Ministériu.

Entretantu marka mós prezensa iha sorumutu refere Koordenador GAPPEVIF Sr. Filomeno dos Santos, Asesora Jurídika FDCH Sra. Estefánia Correia, Xefe Gabinete MJ, Diretór CFJ no Asesora Jurídika Ministériu Justisa. (Mídia FDCH)

 

 

Related Post :


Total Viewer : 835 Views || Category: Notisia