DILI- 17/09/2018 Sekretáriu Ezekutivu Fundo de Desenvolvimento do Capital Humano (FDCH) Sr. Isménio Martins da Silva halo aprezentasaun kona-ba progresu servisu FDCH hahú hosi 2011-2018 no saida mak FDCH sei halo iha futuru, iha Jornada Orsamentál tinan 2019 ho tema“Promove Planeamentu no Orsamentu ho Efisiénsia no kualidade”.
Jornada orsamentál 2019 ne’ebé ho objetivu atu define prioridade nasionál hodi guia elaborasaun orsamentu tinan 2019 ne’e realiza durante loron rua 17-18/09/2018, iha edifísiu Ministériu Finansas Ai-tarak laran ne’ebé organiza hosi Ministériu Finansas no dirije direita hosi Primeiru Ministru VIII Governu Konstitusional S.E. Sr. Taur Matan Ruak.
Iha loron dahuluk Sekretáriu Ezekutivu FDCH Sr. Isménio Martins halo aprezentasaun kona-ba ezisténsia FDCH nian no saida mak FDCH halo ona hahú hosi 2011 -2018 liu-liu iha area dezenvolvimentu rekursus umanus.
Iha aprezentasaun Sekretáriu Ezekutivu FDCH Sr. Isménio Martins da Silva hatete Ezisténsia FDCH nian ho programa prinsipál haat hanesan Formasaun Profisionál, Formasaun Téknika, Bolsa Estudu no Tipu formasaun seluk konsege benefisia ona timoroan hamutuk 66.779, benefisiariu hirak ne’e mai hosi Funsionáriu Públiku no públiku timoroan.
Aleinde halo aprentasaun ba programa prinsipál haat ne’e Sekretáriu Ezekutivu FDCH halo mós aprezentasaun kona-ba servisu sira ne’ebé FDCH hetan mandatu hosi Konsellu Administrasaun FDCH hodi apoiu ba dezenvolvimentu rekursus umanus nasaun foun ne’e nian hanesan: 1) Hala’o Estudu Mapeamentu no Analize Dadus Rekursus Umanus ba Setór Públiku iha Timor-Leste iha tinan 2016 ne’ebé ohin loron prodús ona ba livru no sai hanesan matadalan ba dezenvolvimentu rekursus umanus iha setór públiku.
2.) Halo Avaliasaun ba rezultadu FDCH nian hahú hosi 2011-2014 hodi avalia no verifika programa sira ne’ebé realiza hatudu duni ninia rezultadu ka lae?
3.) Prodús dokumentu Giaun ba Bolsa Estudu no Formasaun, Giaun ba Bolsa Estudu no Formasaun sai nu’udar matadalan ida atu haforsa baze legal ne’ebé eziste ba funsionamentu programa formasaun no bolsa estudu, Dokumentu ne’e hetan aprovasaun hosi Konsellu Ministru iha loron 23 Agostu 2016.
4.) Halo Estudu Levantamento de Dados dos Recursos Humanos Existentes Nacional iha Timor-Leste (LDRHEN) iha 2016 ne’ebé finaliza ona, hodi rekolla dadus ba populasaun tomak iha rai-laran ho 82% hosi populasaun sira ne’ebé tinan 17 ba leten, ne’ebé ohin loron iha hela faze elaborasaun atu produs ba livru.
Diskusaun kona-ba Jornada Orsamentál 2019 “Promove Planeamentu no Orsamentu ho Efisiensia no Kualidade”, durante loron rua dirije direita hosi Primeiru Ministru Sr. Taur Matan Ruak no hetan partisipasaun másimu hosi membru governu sira iha VIII Governu Konstitusionál nian.
Perante Primeiru Ministru no Ministru sira nia oin Sekretáriu Ezekutivu hatete FDCH kontinua prontu atu hala’o servisu hodi kontribui ba dezenvolvimentu rekursus umanus nasaun foun ne’e nian tuir orientasaun ne’ebé VIII governu iha hodi kontribui ba dezenvolvimentu ekonomia, redusaun dezempregu no hamenus kiak iha Timor-Leste.
Akompaña Sekretáriu Ezekutivu partisipa iha eventu ne’e mak koordenadór GAPPEFIV-FDCH Sr. Filomeno dos Santos Lay, Xefe Departamentu da Pesquisa DEPE-FDCH Sr. Hemengildo da Silva no Xefe Departamentu DEPPEFIV Sra. Maria Rosa S. Pinto. (Media FDCH)