DILI, 13/04/2018. Reprezentante Nasaun Nova Zelandia liuhosi ninia Adjunta Embaixadora Sra. Gabrielle Isaak hasoru malu ho Sekretáriu Ezekutivu FDCH Sr. Isménio Martins da Silva iha edifísu Fundo de Desenvolvimento do Capital Humano (FDCH).
Objetivu hosi sorumutu ne’e atu buka tuir dadus hosi rezultadu levantamentu ne’ebé FDCH hala’o iha tinan 2016 liubá no atu hatene servisu Fundo de Desenvolvimento do Capital Humano atu hasa’e rekursus umanus iha Timor-Leste.
Hatán ba ida-ne’e Sekretáriu Ezekutivu Sr. Isménio Martins da Silva hatete katak FDCH seidauk bele públika maibé sei konvida ema hotu inklui diplomata sira bainhira halo lansamentu ba rezultadu levantamentu hosi dadus refere.
“Ami sei labele públika lai tanba ami sei halo hela konsultasaun molok finalize dadus sira ne’e, maibé ami sei konvida ita-boot sira bainhira halo ona lansamentu ba dadus sira ne’e,” hateten Sr. Isménio Martins da Silva
Iha biban hanesan Sekretáriu Ezekutivu ne’e hato’o liutan fatóres hosi progresu ne’ebé durante ne’e FDCH iha atu dezenvolve rekursus umanus iha Timor-Leste.
“Ami iha dadus sira hotu atu dezenvolve rekursus umanus iha nasaun ida-ne’e, tanba antes ne’e ami halo ona estudu boot ida ho naran Levantamentu dadus rekursus umanus ezistentes iha Timor-Leste ho objetivu atu hatene ema ida-idak nia potensialidade no ba futuru ami hakarak tau orsamentu para bele responde potensialidade sira ne’ebé iha daudaun”. Haktuir Sekretariu Ezekutivu FDCH.
Entretantu Vise Embaxadora ne’e mós louva ho FDCH nia servisu tanba hatudu ona progressu boot atu apoiu ema timoroan hotu atu hasa’e rekursus umanus liuhosi bolsa estudu no formasaun profisionál.
“FDCH nia servisu hatudu progressu, tanba durante tinan hira nia laran konsege prodús ona númeru rekursus umanus ne’ebé boot iha Timor-Leste,”hatete diplomata ne’e durante ninia intervensaun.
Enkuantu iha okaziaun ne’e mós Sekretáriu Ezekutivu rekomenda ba Vise Embaxadora ne’e nune’e ba futuru bele servisu hamutuk atu hasa’e liutan rekursus umanus iha Timor-Leste.
Sorumutu durante oras ida ho balun ne’e konta mós partisipasaun hosi Koordenador Gabinete Jestaun no Sistema Informasaun Sr. Henrique do Rosário inklui Xefi Departementu sira iha Salaun Knowledge Center FDCH. (Media FDCH).