Dili, 22/02/2019, Sekretáriu Ezekutivu  Fundo de Desenvolvimento do Capital Humano (ST-FDCH) Sr. Isménio Martins da Silva afirma benefisiariu FDCH durante ne’e mai hosi Munisipiu hotu inklui Rejiaun Administrativu Espesial Oe-Cusse Ambeno.

“Dadus ne’ebé mak ami sempre  hato’o mai ita boot sira bele haree, kuaze iha munisipiu sira ne’e maioria hanesan, kuandu ha’u servisu iha FDCH iha 1 Abríl 2014, bainhira fila hosi adidu traballu SEPFOPE  iha Australia, ami komesa rejista no haree katak, dadus ba benefisiarius ne’e maioria hanesan reprezenta duni munisipiu tomak,” hatete Sekretariu  ezekutivu iha Sala Plenaria Parlamentu Nasionál hodi hatán ba preokupasaun deputadu sira nian kona-ba atribuisaun bolsa estudu ba kada munisipiu ne’ebé tuir sira la hanesan.

“Ita nafatin kontinua ho polítika fó asesu ba ema hotu-hotu, tinan ida ne’e ita sei fó subsídiu individuias ba estudante sira ne’ebé estuda hela iha rai laran ka rai li’ur bazeia ba sira nia notas katak, se nia siénsia exata 2.75 no ba siénsia sosiais ninia IPK ne’e 3,” hatete tan  Sekretáriu Ezekutivu FDCH Sr. Isménio Martins hodi hatán ba preokupasaun deputadu sira nian kona-ba asesu sidadaun sira nian ba FDCH durante ne’e.

Tuir dadus númeru benefisiáriu ne’ebé FDCH iha reprezenta munisipiu tomak, hahú hosi 2011 to’o mai 2018 timoroan ne’ebé hetan bolsa, hodi  hala’o sira nia estudu iha rai laran no rai li’ur hamutuk 5005 ne’ebé espalla iha 227 universidade, hosi númeru ne’e iha bolseirus 3 mill resin  mak remata ona sira nia estudu  no ohin loron fila ona mai Timor.

Bolseiru hirak ne’ebé remata tiha sira nia estudu fila mai 80% hetan ona servisu iha instituisaun sira públiku no privadu 10% kria rasik servisu ba sira nia-an no 10 % ohin loron buka hela servisu.

Atu lori benefisiáriu sira asesu ba servisu, iha 2019 FDCH sei realiza programa estájiu profisionál ba bolseiru graduadu sira ne’ebé ohin loron seidauk servisu nune’e, liuhosi estájiu iha instituisaun estadu no privadu sira benefisiairus sira bele hetan esperiénsia hodi absorve iha merkadu traballu.

Entretantu kona-ba mekanizmu fornese bolsa estudu ba Timoroan sira, FDCH servisu hamutuk ho Ministériu sira tomak, ministériu sira identifika planu kada tinan hato’o nia planu prioridade kada setór no proporsta ne’e sei hato’o mai iha konsellu administrasaun hodi fó desizaun ba area prioridade sira ne’e hodi halo aprovasaun, signifika katak FDCH la deside rasik se mak atu ba eskola.

Nune’e  mós benefisiairius ba Veterano no kombatentes nia oan hahú hosi FDCH ninia ejistensia mai to’o ohin loron iha ona benefisiarius 500 resin.

“Bolsa estudu ba veteranu nia oan ita hahú hala’o tiha ona,  ita iha benefisiáriu mais de 500 ne’e  veteranos e Combatentes libertacão da Partia  nia oan, dezde prezidente Konsellu Administrasaun Sr. Kay Rala Xanana Gusmão asumi kargu Primeiru Ministru mai to’o Ministru MPIE, iha ne’ebá iha tiha ona programa lubuk ida ne’ebé ita hetan orientasaun para  asegura veretanus nia oan sira,” hatete Sr. Isménio Martins hodi hatán ba preokupasaun deputadu kona-ba apoiu FDCH nian ba Veteranos no Combatentes sira nia oan.

Benefisiarius hosi Veteranos no Combatentes nian oan hirak ne’e hala’o sira nia estudu iha nivel lisensiatura to’o nivel mestradu.

Sekretariu ezekutivu FDCH mós promete prontu atu fornese dadus benefisiairu iha area bolsa estudu nian ho detallu ba deputaudatu sira iha tempu besik, nune’e deputadu sira kontinua akompaña servisu FDCH.(Media FDCH )

Related Post :


Total Viewer : 2561 Views || Category: Notisia