Díli, 24/5/2018. Sekretáriu Ezekutivu Fundo de Desenvolvimento do Capital Humano (FDCH) Sr. Isménio Martins da Silva afirma dijitalizasaun bele ajuda joven sira  koñese mundu.

Lia fuan ne’e hato’o hosi Sekretáriu Ezekutivu FDCH ba partisipante sira iha abertura formasaun WordPress Blogging iha loron kuarta-feira (24/5) semana ida-ne’e iha Pusat Budaya Indonesia, Mascarinhas-Dili.

Liutan Sekretáriu Ezekutivu FDCH hatete ba jovens liu-liu estudante sira tenke uza oportunidade ne’e ho didi’ak tanba ho mundu globalizasaun agora daudaun ema hotu-hotu uza ona meius dijitalizasaun atu kontaktu malu.

“Imi tenke uza oportunidade ne’e ho didi’ak, agora daudaun ema hotu-hotu iha kontaktu malu uza meius hanesan ne’e (dijital) karik imi aproveita ho didi’ak ha’u fiar katak dijitalizasaun bele ajuda imi koñese mundu,” dehan lideransa FDCH ne’e durante ninia intervensaun.

Entretantu Embaixadór Indonesia mai Timor-Leste Sr. Sahat Sitorus iha ninia intervensaun hatete katak atividade sira hanesan mak nu’udar objetivu fundamentál hosi prezensa Embaixada nian iha Timor-Leste tanba hakarak ajuda timoroan hotu-hotu iha parte rekursus umanus nian.

“Ida ne’e mak fundamentu liu hosi ami (Embaixada Indonesia) nia prezensa iha Timor-Leste, atu bele ajuda ema timoroan hotu-hotu atu hasa’e sira nia kapasidade tantu liuhosi edukasaun formal ka non-normal sira hanesan ne’e,” dehan Embaixadór ne’e molok loke atividade formasaun refere.

Marka prezensa ba programa abertura formasaun WordPress Blogging ne’e mak Embaixadór Indonesia Sr. Sahat Sitorus, Sekretáriu Ezekutivu FDCH Sr. Isménio Martins da Silva, Reprezentante Diresaun Jerál Ensinu Superior Ministériu Edukasaun Sr. Moises da Silva no Adidu Edukasaun Indonesia mai Timor-Leste Sr. Edi Sedercor Malatunan.

Tuir ajenda, formasaun ne’e sei hala’o durante loron rua (24-25 Maiu 2018) no partisipantes ema hamutuk 50 ne’ebé mai hosi estudante sira husi universidade oin-oin mak hanesan IOB, UNDIL, Instituto Cristal no UNPAZ. (Média FDCH)

Related Post :


Total Viewer : 1277 Views || Category: Notisia