Dili, 26/9/2018. Ekipa lideransa MCC (Millennium Challenge Corporation) husi governu Amerikanu hasoru malu ho Sekretáriu Ezekutivu Fundo de Desenvolvimento do Capital Humano (FDCH) iha edifísiu FDCH nian ne’ebé lokaliza iha resintu Palaçio do Governo.

Enkontru ne’e nu’udar faze dahuluk husi MCC atu kolekta dadus konabá FDCH nia servisu hodi asegura dezenvolvimentu rekursus umanus iha Timor-Leste. Sra. Catherine Forle nu’udar Senior Operational Consultant MCC nian informa katak governu Amerikánu desidi atu fó apoiu finanseiru ba nasaun sira ho rendimentu ki’ik maibé iha hanoin boot ba Boa-Governasaun, Ekonomia Livre no iha interese atu investe ba nia sidadaun ida-idak, hanesan Timor-Leste.

“Ami nia governu (EUA) deside ona atu finanseira nasaun sira ho rendimentu kiik maibé iha hanoin boot ba boa-governasaun hanesan Timor-Leste”. Dehan Forle durante enkontru nia-laran.

Forle mós konfesa katak Governu EUA liuhusi programa MCC sei aloka orsamentu ho montante entre 100 – 200 milloens dolares Amerikánu durante tinan 5 (lima) nia-laran ba programa 4 hanesan tuir mai; 1) Jestaun finansas públicas, 2) Hadia ambiente negósiu, 3) Kontribui hodi hadia área nutrisaun, 4) Kapital ka rekursus umanus.

Tuir planu, tinan 2019-2020 MCC sei hala’o nafatin programa hodi dezeña projetus MCC nian hamutuk ho governu Timor-Leste, no programa refere sei implementa loloos iha tinan 2021.

Hataan ba ida-ne’e Sekretáriu Ezekutivu FDCH Sr. Isménio Martins da Silva hatete katak sei aprezenta asuntu ne’e ba Ministru MESCC atu haree hamutuk saida mak FDCH ho MESCC bele kontribui iha parte dezenvolvimentu rekursu umanu nian.

“Hau sei aprezenta hanoin balun ba MESCC no depois sei hare sé MCC ho FDCH bele partilla rekursus ruma wainhira ita ko’alia konabá investe iha dezenvolvimentu rekursus umanus ba iha futuru”. Tenik lideransa FDCH ne’e iha ninia Intervensaun.

Tanba ne’e, aproveita tempu molok termina enkontru, ekipa lideransa MCC konvida Sekretáriu Ezekutivu FDCH atu bele partisipa iha programa konsultasaun ne’ebé organiza husi MCC iha loron sesta 28 Setembru 2018 atu ko’alia no debate konabá programas prioridades saida mak MCC sei bele aloka liután ba prioridades Timor-Leste nian.

Enkuantu marka mós prezensa iha enkontru refere Sr. Mariano Reprezentante governu Timor-Leste ba programa MCC. Sra. Hanna no Sr. Brat husi MCC. Sr. Henrique do Rosário Koordenador Jestaun Sistema Informasaun. Sr. Filomeno Lay, Koordenador GAPPEFIV. Sra. Leila Carcerres, Koordenadora Rekursu Umanu, Administrasaun no Finansas Interna inklui Xefe Departementu sira. (Media FDCH)

Related Post :


Total Viewer : 1165 Views || Category: Notisia